Sergei Lavrov utanríkisráðherra Rússlands varaði Vesturlönd við því að reyna að ná fram sigri yfir kjarnorkuveldi í ræðu sinni á allsherjarþingi Sameinuðu þjóðanna í gær. Hann sakaði Vesturlönd um að nota Úkraínu sem verkfæri til þess að sigra Rússland. Bandaríkin og Evrópusambandið sögðu ummæli Lavrovs óábyrg.

Aðeins örfáir dagar eru síðan Vladimír Pútín Rússlandsforseti kynnti áform sín um að breyta reglum Rússlands um beitingu kjarnorkuvopna. Samkvæmt tillögum Pútíns myndu stjórnvöld líta svo á að ef ríki sem ekki býr yfir kjarnavopnum gerir árásir á Rússland í samstarfi við kjarnorkuríki, geti Rússar svarað með árásum á bæði ríki með kjarnorkuvopnum.