Þingmaður á norska stórþinginu hefur tilnefnt palestínska ljósmyndablaðamanninn Motaz Azaiza til friðarverðlauna Nóbels.
AP / ASSOCIATED PRESS
Veggmynd í Lundúnum sem sýnir Motaz Azazia að störfum.
Norska ríkisútvarpið fjallar um málið. Ingvild Wetrhus Thorsvik, þingmaður Venstre, segir að með ljósmyndum og myndskeiðum sem Azaiza birtir á Instagram öðlist milljónir manna um allan heim innsýn í þær skelfingar sem blasi við stríðshrjáðum íbúum Gaza.
Thorsvik segir veröldina alla þurfa að sjá myndir Azaizas til að skilja samtímann og minnast þess sem gerist á Gaza um alla framtíð.
Motaz varð samskiptamiðlastjarna þegar hann tók að birta ljósmyndir og frásagnir af stríðinu á Gaza. Fylgjendum hans á Instagram fjölgaði úr 27 þúsund í 18 milljónir fyrstu 100 daga átakanna.
