Írönsk yfirvöld stöðvuðu för fjölskyldu Mahsa Amini til Strassborgar í Frakklandi þar sem til stendur að þau taki við Sakharov-mannréttindaverðlaununum fyrir hennar hönd á þriðjudag.

Að sögn lögmanns fjölskyldu Amini voru foreldrar hennar og bróðir stöðvuð á flugvelli á leið í flug til Frakklands og vegabréf þeirra gerð upptæk.

Forseti Evrópuþings kallaði eftir því í færslu á samfélagsmiðlum að írönsk yfirvöld dragi ákvörðun sína um ferðabann fjölskyldunnar til baka. Hún sagði þau eiga rétt á að taka á móti verðlaununum fyrir hönd Amini ásamt öðrum hugrökkum írönskum konum og að sannleikurinn verði ekki þaggaður niður.

Mahsa Amini var ung írönsk kona sem lést eftir að hafa verið handtekin af siðgæðislögreglu í Tehran á síðasta ári. Andlát hennar var kveikjan að umfangsmikilli mótmælaöldu í Íran.