Markmið Alþjóðaheilbrigðisstofnunarinnar er að heimurinn verði reiðubúinn að bregðast við þegar næsti heimsfaraldur skellur á.

Tedros Adhanom Ghebreyesus, forstjóri stofnunarinnar lét þessi orð falla við upphaf heimsþings hennar sem hófst í dag og stendur til maíloka. Tedros segir stefnt að því að komist verði að alþjóðlegu, og um leið sögulegu, samkomulagi um heilbrigðisöryggi heimsins.

Það verkefni sé afar brýnt í kjölfar kórónuveirufaraldursins. „Við getum ekki haldið uppteknum hætti,“ sagði forstjórinn. Hann kveðst vonast til að samkomulag verði tilbúið fyrir næsta heimsþing að ári, en það er enn í mótun.