„Það er ekki bara hipphoppliðið sem er að falla fyrir þessum strákum, það eru allir að falla fyrir þeim. Það eru allir að flippa,“ segir Árni Matthíasson tónlistarrýnir um Jóa Pé og Króla, stærstu nýstirni íslenskrar tónlistarsenu.
Jói Pé og Króli - Jóhannes Damian Patreksson og Kristinn Óli Haraldsson - marka sér skýra stefnu í tónsmíðunum. „Við höfum alltaf sagt að við gerum tónlist sem okkur finnst skemmtileg, við syngjum um það sem við fílum. Um leið og skemmtanagildið er farið úr þessu og við erum ekki lengur að gera þetta sem bestu vinir að hafa gaman, þá erum við að gera eitthvað vitlaust - þá er þetta orðið leiðinlegt,“ segja þeir.
Vinsælustu tónlistarmenn landsins
Fyrsta lagið af nýútkominni plötu þeirra, Gerviglingri, nefnist B.O.B.A og ætlaði allt að æra í lok sumars. Vinsældir þess virðist engan endi ætla að taka, en hálf milljón hefur horft á það á Youtube, og nýjasta plata þeirra, Gerviglingur, raðaði sér í efstu sæti vinsældalista á Spotify. Lagið hljómar úr öllum áttum, og það ber öll helstu einkenni höfundanna tveggja - galsa, húmor, hnyttinn texta og breiðar vísanir.
Árni segist vel skilja tröllvaxnar vinsældir B.O.B.U. og tónlistar strákanna í heild. „Þegar svona gerist þá er eitthvað sem talar beint til mjög stórs hluta samfélagsins. Það geislar af þeim einlægnin og þetta er svo mikið ekta og lagið er frábært. Textinn er ótrúlega góður, hann segir sögu, það er húmor, pathos, harmur og allur pakkinn. Og Króli vinnur náttúrulega leiksigur í þessu vídjói, alveg fáránlega góður,“ segir hann.
Hvorugur drengjanna segist smíða sérstaka persónu utan um rappið sitt. „Alls ekki, ég geri bara það sem ég fíla,“ segir Jói.
Króli tekur í svipaðan streng. „Það er alltaf einhver karakter sem fylgir, en þessi karakter er mjög minimalískur.“
Fjallað var um JóaPé og Króla í Menningunni, innslagið má sjá hér að ofan.