HSÍ sendi í dag 28-manna lista til Evrópska handknattleikssambandsins, EHF, yfir þá leikmenn sem landsliðsþjálfarinn Geir Sveinsson hefur úr að velja fyrir EM karla í handbolta sem hefst í Króatíu í janúar.

Athygli vekur að Róbert Gunnarsson er á lista en hann hafði gefið það út að landsliðsskórnir væru komnir á hilluna.

Hef ekki verið hress með línumannsstöðuna

Róbert leikur í dag með Árósum og er besti sóknarlínumaður sem íslenska landsliðið hefur átt síðasta áratuginn. Hann hefur skorað 773 mörk í 276 landsleikjum fyrir Íslands hönd og farið á fimmtán stórmót.

Geir sagði í samtali við RÚV í dag að hann hefði ekki verið sáttur með frammistöðu línumanna í síðustu verkefnum. „Í stuttu máli kemur það þannig til að ég hef ekki verið allt of hress með línumannsstöðuna. Ég sló því á þráðinn til Róberts og við spjölluðum saman og niðurstaðan varð sú að hann var klár í nafnið hans færi á þennan lista yfir 28 leikmenn sem koma til greina. Hann er klár í að taka þátt ef hann verður fyrir valinu að lokum,“ sagði Geir í dag.

Arnór Atlason inni en enginn Vignir Svavarsson

Geir er einnig með Arnór Atlason í hópnum sem hefur ekki verið valinn í síðustu verkefni en línumaðurinn Vignir Svavarsson kemur ekki til greina að þessu sinni. Þá er Gunnar Steinn Jónsson ekki á listanum en Hreiðar Levý Guðmundsson, sem hefur slegið í gegn með Gróttu, er einn af fjórum markvörðum sem koma til greina. 

Þessir leikmenn eru á 28-manna lista hjá Geir:* 

Markverðir:

  • Björgvin Páll Gústavsson, Haukar
  • Aron Rafn Eðvarsson, ÍBV
  • Ágúst Elí Björgvinsson, FH
  • Hreiðar Levý Guðmundsson, Gróttu

Línumenn:

  • Kári Kristján Kristjánsson, ÍBV
  • Róbert Gunnarsson, Århus Håndbold
  • Arnar Freyr Arnarsson, IFK Kristianstad
  • Bjarki Már Gunnarsson, Stjarnan
  • Atli Ævar Ingólfsson, Selfoss

Vinstri skyttur:

  • Aron Pálmarsson, Barcelona
  • Arnór Atlason, Ålborg Håndbold
  • ÓIafur Andrés Guðmundsson, IFK Kristianstad
  • Daníel Þór Ingason, Haukar
  • Ólafur Gústafsson, KIF Kolding
  • Elvar Örn Jónsson, Selfoss

Hægri skyttur:

  • Rúnar Kárason, TSV Hannover/Burgdorf
  • Ásgeir Örn Hallgrímsson, Nimes
  • Geir Guðmunsson, Cesson Rennes
  • Ómar Ingi Magnússon, Århus Håndbold

Miðjumenn:

  • Janus Daði Smárason, Ålborg Håndbold
  • Ýmir Örn Gíslason, Valur
  • Gísli Þorgeir Kristjánsson, FH

Vinstra horn:

  • Guðjón Valur Sigurðsson, Rhein-Neckar Löwen
  • Stefán Rafn Sigurmannsson, SC Pick Szeged
  • Bjarki Már Elísson, Füchse Berlin

Hægra horn:

  • Arnór Þór Gunnarsson, Die Bergische Handball Club
  • Theodór Sigurbjörnsson, ÍBV
  • Óðinn Þór Ríkharðsson, FH

*Stöður leikmanna eru skráðar eins og þær eru færðar til bókar hjá EHF samkvæmt listanum.