Í Klassíkinni okkar verður boðið upp á tónverk frá fjórum öldum tónlistarsögunnar, allt frá barokki til kvikmyndatónlistar. Kallað var eftir frásögnum af því hvernig tónlist hefur fléttast við minningar og ævi fólks. „Þetta er eiginlega eins og óskalagadagskrá. Frásagnirnar tengjast lögunum sem rötuðu í efnisskrána,“ segir Halla Oddný Magnúsdóttir.
Tónleikarnir Klassíkin okkar verða haldnir í fjórða sinn annað kvöld, föstudaginn 30. ágúst. Í þetta sinn er yfirskrift efnisskrárinnar „Tónlistarsagan þín“, þar sem kallað var eftir sögum af því hvernig sígild tónverk hafa haft áhrif á Íslendinga. Tónleikarnir eru samstarf Sinfóníuhljómsveitar Íslands og RÚV.
„Það er kannski svolítið vítt safnheiti,“ segir Guðni Tómasson, sem ásamt Höllu Oddnýju Magnúsdóttur kynnir verkin sem flutt verða í beinni útsendingu á RÚV og Rás 1. „Við erum að velta fyrir okkur tónlistarsögunni sem slíkri auðvitað en við erum líka að velta fyrir okkur hvernig fólk umgengst tónlist í daglega lífinu. Í innslögum í útsendingunni okkar veltum við því fyrir okkur hvernig fólk er að umgangast þessa músík í daglegu lífi.“
Á tónleikunum fáum við að heyra tónlistarsögur fólks. „Hver maður á sína tónlistarsögu og margir eiga sögu af því hvernig tónlist hefur mótað líf þeirra eða fléttast inn í mikilvægustu augnablikin á ævi þeirra og litað minningar og atvik,“ segir Halla Oddný.
Halla nefnir tiltekinn kafla í klarinettukonsert Mozarts sem dæmi. Upptaka frá tónleikum Sinfóníuhljómsveitar Íslands með einleik Arngunnar Árnadóttur er í dag vinsælasta upptakan á verkinu á Youtube þar sem horft hefur verið á tónleikana oftar en sex milljón sinnum. „Það voru kannski 300-400 manns sem heyrðu þetta meðan Mozart lifði – í mesta lagi.“
Kaflinn er einmitt meðal þeirra fjórtán tónverka sem flutt verða í Klassíkinni okkar 30. ágúst, í beinni útsendingu frá Eldborg klukkan 20. Hljómsveitarstjóri er Daníel Bjarnason en einnig kemur fram fjöldi einsöngvara, einleikara og kóra.