Börkur Sigþórsson leikstjóri hefur verið ráðinn til að leikstýra þremur fyrstu þáttunum af sex í nýrri spennuþáttaröð fyrir BBC, sem nefnist Baptiste.Þættirnir eru afleggjari af spennuþáttunum vinsælu The Missing.
Það er í mörg horn að líta hjá Berki Sigþórssyni leikstjóra þessa dagana. Hann frumsýnir sína fyrstu kvikmynd í fullri lengd í næstu viku, spennumyndina Varg, og lýkur síðan tökum á sínum hluta í annarri þáttaröð af Ófærð, sem verður sýnd í haust. Í beinu framhaldi fer hann til Bretlands og hefur undirbúning á tökum á spennuþáttaröðinni Baptiste sem BBC framleiðar.
Baptiste er afleggjari eða „spin-off“ af sjónvarpsþáttunum The Missing, sem hafa notið mikilla vinsælda um allan heim — þar á meðal hér á Íslandi — og hlotið tilnefningar til Golden Globe, BAFTA og Emmy-verðlauna. Þar bregður Frakkinn Tchéky Karyo sér aftur í hlutverk franska rannsóknarlögreglumannsins Julian Baptiste, sem þættirnir eru kenndir við.„Þetta eru glæpaþættir, gerast í Amsterdam og þarna fylgjumst við með lífi og störfum Julian Baptiste,“ segir Börkur og nefnir að það hafi meðal annars verið fyrir tilstilli Ólafs Darra Ólafssonar, sem hann leikstýrði í Ófærð, að hann hreppti hnossið.
„Ólafur Darri lék í síðari þáttaröðinni af The Missing. Framleiðendurnir hringdu í hann til að spyrja hvort mér væri treystandi í þetta verkefni.“ Þetta er ekki í fyrsta sinn sem Börkur leikstýrir breskum sjónvarpsþætti. Fyrir tveimur árum leikstýrði hann þætti í þáttaröðinni Endeavour fyrir ITV en þeir fjalla um rannsóknarlögreglumanninn Morse, sem er íslenskum sjónvarpsáhorfendum að góðu kunnur, á hans yngri árum.
Rætt verður við Börk og myndina Varg í Menningunni í kvöld.