Tveir hinsegin listamenn frá Frakklandi, Claude Cahun og Marcel Moore, stóðu í uppátækjasamri undirróðursstarfsemi gegn hernámsyfirvöldum Þjóðverja á Ermarsundseyjunni Jersey, sem var undir þýskum yfirráðum í seinni heimsstyrjöld.
Í ljósi sögunnar á Rás 1 fjallaði um viðburðaríkt lífshlaup Claude Cahun og unnustu háns, Marcel Moore. Heyra má þáttinn í spilaranum hér að ofan.
Cahun og Moore eru í dag þekktust fyrir, auk vinnu sinnar á stríðsárunum, ljósmyndir af Cahun í ýmsum gervum, sem ögruðu viðteknum hugmyndum um kyn og kyngervi á millistríðsárunum, og eru raunar enn hinsegin listafólki og fræðimönnum innblástur.
Vakin er athygli á fyrri þáttum Í ljósi sögunnar um hinsegin sögu. Til dæmis um óeirðirnar á næturklúbbinum Stonewall Inn í New York 1969; og þýska lækninn Magnus Hirschfeld, frumkvöðul í kynfræði og réttindabaráttu hinsegin fólks.