Leikskólinn Sunnuás hefur flutt tímabundið inn í gamla Morgunblaðshúsið í Kringlunni vegna viðgerða á húsnæði skólans. Leikskólastjórinn vill helst ekki flytja til baka, enda hafa börnin 120 aldrei haft jafnmikið pláss.
Neðstu hæðinni á Kringlunni 1, sem um skeið hýsti Morgunblaðið, var breytt í leikskóla á þremur vikum. Leikskólinn Sunnuás flutti þangað inn í byrjun júní til þess að viðgerðir gætu hafist á húsnæði skólans við Dyngjuveg. Húsnæðið er aðeins hugsað til skamms tíma á meðan beðið er eftir færanlegum stofum til að stilla upp á lóð skólans.
Rakel Ólafsdóttir aðstoðarleikskólastjóri segir húsnæðið að mörgu leyti skemmtilegra en það sem nú er í viðgerð. „Skólinn á auðvitað heima í Laugardalnum, en húsnæðið hér er miklu betra og okkur líður miklu betur í þessu húsnæði. Færanlegu kennslustofurnar þurfa að vera ansi góðar til að vera betra en þetta.“
Vinnumálastofnun flutti nýverið úr húsinu í Kringlunni vegna mygluskemmda á efri hæðum. Rakel segir að Reykjavíkurborg hafi, í samstarfi við verkfræðistofuna Eflu, gengið úr skugga um að neðsta hæðin væri í lagi og komið fyrir sérstökum loftgæðamælum á veggjum. Rakel segir að heilbrigðiseftirlitið hafi hins vegar haft áhyggjur af hljóð- og svifryksmengun vegna nándar við umferðargötur og því stillt upp mengunarmælum utan á húsið.
Og börnunum virðist líða vel hér? „Já, ég meina, fyrstu dagana eftir að við flytjum hlaupa þau í fangið á okkur og segja, þetta er uppáhaldsleikskólinn minn. Þannig að ég myndi halda að þeim líði bara alveg ágætlega hérna ,“ segir Rakel.