Brýnasta verkefni stjórnvalda til að taka á undirboðum og brotastarfsemi á vinnumarkaði er að taka á kennitöluflakki á skilvirkan hátt, samkvæmt tillögum starfshóps um aðgerðir gegn skipulögðum brotum á vinnumarkaði. Tryggja þarf fórnarlömbum vinnumansals og nauðungarvinnu viðeigandi aðstoð og vernd. Setja þarf sérstök lög um mansal.
Tillögur samstarfshóps til að sporna gegn félagslegum undirboðum á innlendum vinnumarkaði voru birtar í dag. Ásmundur Einar Daðason félagsmálaráðherra stofnaði hópinn síðasta haust.
Helstu tillögur hópsins
- Brýnasta verkefnið er að taka á kennitöluflakki á skilvirkan hátt. Stjónvöld þurfi heimild til þess að setja forsvarsmenn fyrirtækja í tímabundið bann við þátttöku í stjórnum félaga með takmarkaða ábyrgð auk fleiri atriða.
- Tryggð viðeigandi aðstoð og vernd fyrir fórnarlömb vinnumansals og nauðungarvinnu. Þá verði skilgreining á mansali endurskoðuð og segir hópurinn að setja þurfi sérstök lög um mansal sem og aðgerðaráætlun gegn því.
- Lögregla, Ríkisskattstjóri, Vinnueftirlitið og Vinnumálastofnun geri með sér formlegt samkomulag um skipulagða vinnu gegn brotastarfsemi á vinnumarkaði.
- Sett verði skylda til keðjuábyrgðar í lög um opinber innkaup.
- Komið í veg fyrir brotastarfsemi á vinnumarkaði undir formerkjum starfsnáms eða sjálfboðastarfsemi og ramminn utan um það skýrður.
- Bæta upplýsingagjöf til erlendra starfsmanna.