Guðni Ágústsson, formaður orðunefndar, segir mikilvægt að setjast yfir þá stöðu sem komin er upp nú eftir að handhafi fálkaorðunnar hefur verið dæmdur í fangelsi. Sigurður Einarsson, fyrrverandi stjórnarformann Kaupþings, var í Hæstarétti dæmdur í 4 ára fangelsi fyrir sinn þátt í Al-Thani málinu.
11.grein Forsetabréfs um hina íslensku fálkaorðu segir: „Stórmeistari getur, að ráði orðunefndar, svipt mann, sem hlotið hefur orðuna, en síðar gerst sekur um misferli, rétti til að bera hana“. Forseti Íslands er stórmeistari samkvæmt lögunum.
Ólafur Ragnar Grímsson, forseti Íslands, sæmdi Sigurð riddarakrossi hinnar íslensku fálkaorðu í ársbyrjun 2007 „fyrir forystu í útrás íslenskrar fjármálastarfsemi“, eins og það var orðað í Stjórnartíðindum. Guðni Ágústsson segir að athygli orðunefndar hafi verið vakin á málinu og henni sé skylt að fara yfir málið og kanna hvort slíkt mál hafi komið upp áður og hvað þá hafi verið gert. Næsti fundur orðunefndar verði haldinn eftir mánaðamót.
