Lögregla óskar eftir vitnum að innbrotum

12.01.2017 - 10:44
Mynd með færslu
 Mynd: Shutterstock
Lögreglan á höfuðborgarsvæðinu óskar eftir upplýsingum um tvö innbrot sem framin voru í höfuðborginni í gærkvöldi. Annað innbrotið var í Grafarvogi, hitt í Árbæ. Bæði húsin voru mannlaus. Lögregla rannsakar fleiri innbrot sem svipar mjög til þessara og voru framin fyrir skömmu. Hugsanlegt er að sömu aðilar hafi verið að verki.

Tilkynning lögreglu er svohljóðandi:

Í gærkvöld var brotist inn í tvö einbýlishús á höfuðborgarsvæðinu. Annað innbrotanna var í Grafarvogi og hitt í Árbæ, en bæði húsin voru mannlaus þegar þjófarnir létu til skarar skríða. Málin eru til rannsóknar hjá Lögreglunni á höfuðborgarsvæðinu, en hún rannsakaði einnig nokkur innbrot í einbýlishús í umdæminu sem voru einkum framin að kvöld- og næturlagi seint á síðasta ári en innbrotunum nú svipar mjög til þeirra.

Ekki er ósennilegt að einhver hafi séð til þjófanna og því er ítrekað að fólk láti lögreglu vita um grunsamlegar mannaferðir og að það skrifi líka hjá sér, t.d. bílnúmer eða jafnvel lýsingar á fólki, ef eitthvað óvenjulegt á sér stað í nánasta umhverfi þess. Innbrotsþjófar fylgjast gjarnan með húsum áður en þeir láta til skarar skríða og því er mikilvægt að hafa þessi atriði í huga. Munið að það er betra að hringja einu sinni of oft í lögregluna með upplýsingar af þessi tagi en einu sinni of sjaldan. Lögreglan vill ennfremur minna á mikilvægi þess að fólk gangi tryggilega frá heimilum sínum þegar það fer að heiman og ekki er úr vegi að tilkynna nágrönnum um slíkt, en nágrannavarsla getur skipt sköpum þegar kemur að því að upplýsa innbrot eða koma í veg fyrir þau. Sérstaklega er minnt á að útiljós séu kveikt þar sem þau eru til staðar, hvort sem um ræðir bakatil við hús eða að framanverðu. Slíkt einfaldar nágrönnum að sjá umferð/mannaferðir við húsin.

Upplýsingum má koma á framfæri í síma 444-1000, með einkaskilaboðum á fésbókarsíðu Lögreglunnar á höfuðborgarsvæðinu eða í tölvupósti á netfangið abending@lrh.is Ef óskað er eftir skjótri aðstoð lögreglu vegna yfirstandandi innbrots skal undantekningarlaust hringja í 112.


Deila frétt



Jóhann Bjarni Kolbeinsson
Fréttastofa RÚV
12.01.2017 - 10:44