Tæplega þriðjungur Íslendinga er fylgjandi afglæpavæðingu fíkniefnaneyslu, samkvæmt nýrri könnun. Meirihlutinn er hins vegar andvígur.
Umræða um afglæpavæðingu fíkniefna hefur aukist jafnt og þétt síðustu ár. Afglæpavæðing er ekki það sama og lögleiðing. Með afglæpavæðingu er oft átt við að afnema refsingar fyrir að hafa neysluskammta undir höndum. Fíkniefnin yrðu enn ólögleg og áfram yrði refsivert að selja þau.
Sjálfstæðismenn samþykktu á landsfundi um helgina ályktun um afglæpavæðingu, og Guðmundur Steingrímsson, þingmaður Bjartrar framtíðar, talaði á Alþingi í síðustu viku fyrir lögleiðingu kannabisefna. Kristján Þór Júlíusson heilbrigðisráðherra hefur talað fyrir afglæpavæðingu. „Við eigum að skoða á hverjum tíma alla möguleika sem við eigum í stöðunni til þess að berjast gegn vímuefnavanda,“ segir Kristján.
Hann vill þó bíða eftir niðurstöðu starfshóps sem var skipaður í fyrra, og vonast er til að skili niðurstöðu fljótlega. „Við erum með fagfólk í þessari vinnu, og ég vil síður vera að gefa þeim einhver fyrirmæli um það að þau eigi að komast að einhverri einni ákveðinni niðurstöðu sem að einum stjórnmálamanni dettur í hug. Það er miklu skynsamlegra að fá fram faglega ígrundaðar tillögur og taka síðan ákvarðanir um framhaldið á þeim grunni.“
Almenningur er hins vegar ekki jafn áhugasamur um breytingar og sumir stjórnmálamenn, ef marka má nýja könnun félagsfræðinganna Helga Gunnlaugssonar og Jónasar Orra Jónassonar, sem verður kynnt formlega á félagsvísindaráðstefnunni Þjóðarspeglinum í Háskóla Íslands á föstudag.
30% þeirra sem svöruðu voru fylgjandi því að varsla á neysluskammti til einkanota yrði gerð refsilaus, en 56% andvíg. 14% voru hvorki fylgjandi né andvíg. Mun fleiri karlar eru fylgjandi en konur, og ungt fólk er frekar fylgjandi en gamalt.