„Hafðu smá sómakennd og drullaðu þér í burtu“

Uppákoma varð á nefndarsviði Alþingis í morgun eftir að fundi stjórnskipunar- og eftirlitsnefndar lauk en á fundinum sátu forsvarsmenn Seðlabanka Íslands fyrir svörum. Að fundi loknum hugðist Már Guðmundsson, seðlabankastjóri, taka í höndina á Þorsteini Má Baldvinssyni, Samherja, en sonur hans gekk á milli. „Hafðu smá sómakennd og drullaðu þér í burtu,“ sagði Baldvin, sonur Þorsteins við Má.

Kolbeinn Óttarsson Proppé, þingmaður Vinstri grænna, bað þá Baldvin um að hafa sig hægan eins og sést og heyrist á meðfylgjandi myndbandi.

Á fundi stjórnskipunar- og eftirlitsnefnd var mál útgerðarfélagsins Samherja til umfjöllunar. Hæstiréttur komst að þeirri niðurstöðu í nóvember 2018 að Seðlabanki Íslands hafi ekki haft heimild til að leggja stjórnvaldssekt á Samherja. Gjaldeyriseftirlit bankans taldi Samherja hafa brotið gjaldeyrislög og gerði húsleit hjá fyrirtækinu árið 2012. Seðlabankinn sendi tvívegis kæru til Sérstaks saksóknara, sem endursendi þær.

Umboðsmaður Alþingis sat fyrir svörum eftirlits- og stjórnsýslunefndar Alþingis fyrr á árinu. Í máli hans kom fram að stjórnsýslu Seðlabankans í málinu hefði verið ábótavant. Þá hefðu vinnubrögð Seðlabankans, sem og skýringar bankans til umboðsmanns, verið gagnrýniverðar.