Gróður og mannvirki hafa áhrif
Margt bendir til þess að gróður og mannvirki hafi veruleg áhrif á veðurfar í höfuðborginni, ekki síst þegar hvassir vindar eru annarsvegar.
Haraldur Ólafsson, veðurfræðingur, hefur borið saman stormtíðni á Keflavíkurflugvelli annarsvegar og Veðurstofu Íslands við Bústaðaveg hinsvegar og niðurstaðan er athyglisverð. Hann segir að fyrstu árin hafi stormar verið álíka tíðir og suður í Keflavík, en svo hafi farið að halla undan fæti í Reykjavík og undanfarin 10 til 15 ár hafi oft verið stormar í Keflavík, en nánast aldrei hér. Þetta verði ekki skýrt öðruvísi en með þeirri byggð og gróðri sem hafi komið hér síðustu áratugina.
Í framhaldi af því má velta fyrir sér áhrifum trjágróðurs á þann sérstaka norðanvind sem steypir sér niður hlíðar Esjunnar og verður oft gríðarhvass á láglendinu. Haraldur segir að væri skógur upp eftir Esjuhlíðum væri líklegt að vindurinn í norðaustanáttinni, á Álfsnesi og í Mosfellsbæ, væri mun hægari en núna og þessir stormar og ofsaveður sem komi úr norðaustri geti jafnvel næstum því horfið
Ertu með athugasemd vegna fréttarinnar? Sendu á frettir@ruv.is
Tilkynna um bilaða upptöku
