Góð kolmunnaköst í Rósagarðinum

09.06.2017 - 15:52
Mynd með færslu
Beitir NK að dæla kolmunna í Rósagarðinum  Mynd: www.svn.is
Kolmunnaskipin hafa verið að fá góðan afla í Rósagarðinum, 65 mílur suðaustur af landinu, undanfarið. Veiðin er þó misjöfn eftir dögum. Skipin eru nú að tínast í land fyrir sjómannadag.

Beitir NK tók tvö góð hol í Rósagarðinum á miðvikudag og Bjarni Ólafsson AK fékk einnig góðan afla. „Fiskurinn þarna er ofboðslega fallegur og stór,“ segir Runólfur Runólfsson, skipstjóri, í viðtali á vef Síldarvinnslunnar. Bjarni landaði 1.300 tonnum á Seyðisfirði í gær.

Verið er að landa 1.900 tonnum úr Beiti í Neskaupstað í dag, en þar af fengust 1.700 tonn í Rósagarðinum. Sturla Þórðarson skipstjóri segir að veiðin hafi verið mjög góð í fyrradag en lítil í gær. „Það er mikil hreyfing á fiskinum þarna og veiðin er dálítið köflótt. Í fyrradag sást töluvert af fiski en minna í gær. Við fengum tvö yfir 500 tonna hol í fyrradag og það er ágætt. Vonandi verður áframhald á þessu,“ segir Sturla.

Gert er ráð fyrir að kolmunnaskipin haldi á ný til veiða í Rósagarðinum eftir sjómannadagshelgina.

Ágúst Ólafsson
Fréttastofa RÚV