Auglýsingafrelsi fylgi sölu áfengis í búðum

01.08.2017 - 10:35
Mynd með færslu
 Mynd: Anton Brink  -  Ruv.is
Forstjóri Ölgerðarinnar segir sátt ríkja um sölukerfi áfengis í gegnum ÁTVR. Ef leyfa á sölu áfengis í matvörubúðum verða framleiðendur að fá að auglýsa vöruna. Þetta verði ekki í sundur slitið.

Gott og gegnsætt kerfi

Andri Þór Guðmundsson forstjóri Ölgerðarinnar segir það sína skoðun að sem mest frelsi eigi að ríkja í viðskiptum og að selja ætti áfengi í matvörubúðum, en að ýmsu sé að huga. „Það verður hins vegar að segjast eins og er að Vínbúðin, eða ÁTVR, hefur staðið sig býsna vel,“ sagði Andri Þór í viðtali á Morgunvaktinni á Rás 1 í morgun.

„Þetta kerfi sem við höfum búið við og hefur þróast er nokkuð gott. Og almennt ríkir sátt um þetta kerfi. Gagnvart framleiðendum og innflytjendum þá sitja allir við sama borð. Þetta er gegnsætt kerfi og við erum sáttir og ánægðir í sjálfu sér með þetta fyrirkomulag. Við kvörtum ekki yfir því,“ segir Andri Þór. 

Frelsi til að auglýsa áfengi verði að fylgja

„En að sama skapi, ef við ætlum að meðhöndla áfengi eins og hverja aðra vöru þá þarf að leyfa auglýsingar. Og fólk þarf að gera sér grein fyrir því að þetta verður ekki slitið í sundur. Við getum ekki bara fært áfengissöluna inn í matvörubúðir án þess að fá að auglýsa.“

Hvers vegna?

„Vegna þess að þá höfum við ekkert vald yfir því að þróa vöruna. Við höfum engin tæki til þess að koma vörunni fyrir almenningssjónir. ÁTVR tekur allar vörur inn sem við framleiðum. Það fá allar vörur jafna möguleika. Við hefðum ekki þá möguleika ef áfengið færi í stórverslanir nema við hefðum áhrif á almenning; með því að vekja athygli á því að þessi vara sé komin í verslanir. Skapa þannig eftirspurnina þannig að verslanirnar taki vöruna inn.“

Áfengisfrumvarpið óskapnaður

„Hvers vegna eru menn að taka þessa umræðu um vínið án þess að þessi umræða fylgi fast með?“ spyr Andri Þór. „Ég veit ekki hvernig þessu frumvarpi ríður af. Mér finnst þetta frumvarp vera orðinn hálfgerður óskapnaður. Og að hafa rekstur Vínbúðanna samhliða rekstri stórverslananna finnst mér algerlega galið,“ segir Andri Þór Guðmundsson forstjóri Ölgerðarinnar.

Mynd með færslu
Kristján Sigurjónsson
Fréttastofa RÚV
Morgunvaktin
Þessi þáttur er í hlaðvarpi