Benedikt Jóhannesson fjármálaráðherra segir að svör Fjármálaeftirlitsins við ellefu spurningum sínum sem hann lagði fyrir stofnunina séu ekki fullnægjandi. Spurningarnar sneru að kaupum erlendra vogunarsjóða á tæplega 30 prósenta hlut í Arion banka. Hann segir nauðsynlegt að fá upplýsingar um hverjir standi að baki kaupunum. Nú spyrji sig allir þeirrar spurningar hvort þarna sé einhver lundafletta í gangi. Þar vísar hann í aðferðir Kaupþings og Ólafs Ólafssonar við kaupin á Búnaðarbankanum 2003.
Starfsmenn Fjármálaeftirlitsins eru greinilega ekki komnir langt með að skoða þá sem keyptu hlutabréfin í Arion banka, sagði Benedikt í sjónvarpsfréttum klukkan sjö. Aðeins komi fram að það séu dótturfélög tilgreindra kaupenda sem standi að kaupunum, eins og komið hafi fram í fjölmiðlum. „Þannig að það er eiginlega ekkert nýtt þarna. Þau ítreka að það sé ekki farin í gang skoðun þeirra vegna þess að þau líta svo á að 9,99 prósent séu ekki virkur eignarhlutur,“ sagði Benedikt. Virkur eignarhlutur stofnast, lögum samkvæmt, við tíu prósenta eign.
Benedikt sagði að svo virtist sem það breytti engu í huga Fjármálaeftirlitsins að það væru kröfuhafar Kaupþings sem væru að kaupa hlut í bankanum.
„Ég held að það sé afar mikilvægt fyrir íslenskt samfélag að það komi skýr svör. Það er líka mikilvægt bæði fyrir þessa eigendur og fyrir bankann að það sé ekki tortryggni í garð þessara aðili. Gæti það verið að þarna sé einhver lundaflétta í gangi? Það hugsa allir þannig. Við eigum heimtingu á að vita það og verðum að skoða það strax,“ sagði Benedikt en kvaðst lítið geta gert í krafti embættis síns: „Ég get ekki beitt mér öðruvísi en að spyrja aftur og láta í ljósi þá eindregnu skoðun mína að íslenska þjóðin eigi rétt á að vita þetta.“