Ævar Þór á meðal bestu barnabókahöfunda Evrópu

Mynd með færslu
 Mynd: Ævar Þór Benediktsson  -  RÚV
Alþjóðlega barnabókahátíðin Hay Festival hefur kynnt hinn svokallað Århus 39-lista, yfir 39 bestu barnabókahöfunda Evrópu 40 ára og yngri. Ævar Þór Benediktsson, eða Ævar vísindamaður, er þar á meðal samkvæmt tilkynningu frá Forlaginu.

Ævar er staddur á bókasýningunni í London, sem stendur nú yfir, til að veita viðurkenningunni móttöku og taka þátt í pallborðumræðum um barnabækur.

Metnaðarfullt verkefni fyrir menningarborg Evrópu

Höfundarnir á listanum koma til með að vinna saman að verkefni fyrir menningarborg Evrópu 2017, Árósar í Danmörku. Þar verður haldin bókmenntahátíð síðar á árinu auk þess sem að út koma tvö söfn með verkum höfundanna á dönsku og ensku.

Höfundarnir 39 fengu það verkefni að skrifa sögu byggða á þemanu „Ferðalag“ en þær koma út í fyrrnefndum söfnum hjá Alma Books í Bretlandi og Gyldendal í Danmörku. Saga Ævars, „Bókaflóttinn mikli“, fjallar um vaskan bókasafnsfræðing sem kemst í hann krappann.

Í dómnefnd sátu þrír virtir barna- og unglingabókahöfundar; Kim Fupz Aakeson frá Danmörku, Ana Cristina Herreros frá Spáni og Matt Haig frá Englandi. Frekari upplýsingar um hátíðina og höfundana 39 má nálgast á vef hennar.

 

Mynd með færslu
Davíð Kjartan Gestsson
vefritstjórn