Kórónuveiran: útbreiðslan á korti
Farsóttin hefur dreifst hratt um heiminn. Rúmlega þrjár milljónir manna hafa greinst með kórónuveiruna og fleiri en 200 þúsund látist. Kveikur hefur kortlagt dreifinguna á Íslandi og um heiminn.
![Kórónuveiran: útbreiðslan á korti](/kveikur/content/images/size/w2000/2020/04/20200428_island_smit.png)
Kortið að ofan sýnir fjölda fólks sem hefur greinst á landinu frá upphafi, samkvæmt gögnum frá sóttvarnalækni þriðjudaginn 28. apríl. Alls eru tilfellin tæplega 1.800.
Stærsti hringurinn á höfuðborgarsvæðinu sýnir fjölda tilfella í Reykjavík, þar sem flestir hafa greinst. Minni hringir í miðju þess stóra sýna tilfelli í Kópavogi, Garðabæ, Hafnarfirði, Mosfellsbæ og á Seltjarnarnesi.
Á landsbyggðinni hefur verið langmest um staðfest smit í Vestmannaeyjum og þar á eftir í Bolungarvík. Mörg tilfelli hafa líka komið upp til að mynda á Akureyri, Ísafirði og Hvammstanga. Hver hringur sýnir í flestum tilvikum greind tilfelli á tilteknum þéttbýlisstað ásamt nærsveitum.
Upplýsingar sem hér birtast á kortum og í listum byggja á gögnum frá sóttvarnalækni. Stundum er misræmi milli gagna sóttvarnalæknis og upplýsinga sem lögregluembætti birta. Sóttvarnalæknir segir að það megi nær alltaf rekja til þess að fólk hafi lögheimili á einum stað en búi í raun á öðrum. Einnig geti orðið mistök við skráningu.
Listinn að neðan sýnir uppsafnaðan fjölda tilfella á stöðum þar sem tíu eða fleiri hafa greinst.
![](https://www.ruv.is/kveikur/content/images/2020/04/20200428_island_tafla_smit.png)
Faraldurinn virðist hafa náð hámarki á Íslandi í byrjun apríl, en sóttvarnalæknir hefur varað við andavarleysi. Gögn bendi til að stór hluti landsmanna sé enn móttækilegur fyrir veirunni.
Rúmlega 90 prósent þeirra sem hafa greinst á Íslandi eru nú laus við veiruna. Tíu hafa látist.
Enn eru á annað hundrað virk staðfest tilfelli í landinu. Dreifing þeirra er sýnd á kortinu að neðan. Langflest tilfelli eru á höfuðborgarsvæðinu og norðanverðum Vestfjörðum.
![](https://www.ruv.is/kveikur/content/images/2020/04/20200428_island_virk.png)
Virkum tilfellum hefur fækkað hratt í Reykjavík síðustu vikur. Sama er að segja um marga staði á landsbyggðinni.
Hér sjást þeir staðir á landinu þar sem virk staðfest tilfelli eru fimm eða fleiri, samkvæmt gögnum sóttvarnalæknis.
![](https://www.ruv.is/kveikur/content/images/2020/04/20200428_island_tafla_virk.png)
Á myndinni að neðan sést fækkun virkra tilfella á suðvesturhorninu á þremur vikum.
Fyrst sést staðan samkvæmt gögnum frá mánudeginum 6. apríl, þegar virk tilfelli í Reykjavík voru skráð rúmlega 400 í gögnum sóttvarnalæknis, og síðan samkvæmt gögnum mánudagsins 27. apríl, þegar virkum tilfellum hafði fækkað í rúmlega 70.
![](https://www.ruv.is/kveikur/content/images/2020/04/Sequence-03.gif)
Línuritið að neðan sýnir fjölda virkra tilfella á landinu öllu á hverjum degi. Tilfellum fjölgaði hratt í mars, en fór síðan að fækka hratt fljótlega eftir mánaðamót.
Á þessu korti má svo sjá hvernig veiran hefur dreifst um nær allan heim. Kortið sýnir fjölda staðfestra tilfella eftir löndum, samkvæmt gögnum Evrópsku sóttvarnastofnunarinnar frá þriðjudeginum 28. apríl.
![](https://www.ruv.is/kveikur/content/images/2020/04/20200428_heimur_smit.png)
Kortin eru unnin með aðstoð Landmælinga Íslands. Íslandskortin eru byggð á gögnum frá sóttvarnalækni og Landmælingum.
Stuðst er við gögn frá sóttvarnalækni sem sýna staðfest og virk tilfelli eftir póstnúmerum. Á kortunum, og listum sem fylgja, hafa póstnúmer verið sameinuð. Hver hringur táknar því í flestum tilvikum þéttbýlisstað ásamt nærsveitum. Á kortunum sjást ekki tilfelli þar sem póstnúmer vantar í gögnum sóttvarnalæknis. Hér má sjá lista yfir öll póstnúmer, með upplýsingum um hvar tilfelli í hverju þeirra eru sýnd á kortunum. Listinn er birtur með fyrirvara um síðari breytingar.
Heimskortið er byggt á gögnum frá Evrópsku sóttavarnastofnuninni (ECDC) og Natural Earth. Myndritið er byggt á gögnum af covid.is.
Sérstakar þakkir fær Ásta Kristín Óladóttir, fagstjóri grunngerðar landupplýsinga og miðlunar hjá Landmælingum Íslands.