Velferð og vistvænar samgöngur

Markvisst er unnið að því að setja heilsu og velferð starfsfólks í forgrunn. Á árinu var kynnt velferðarstefna sem rammar inn velferðaráherslur í fjórum meginþáttum er varða hreyfingu og næringu, vellíðan, jákvæð tengsl og þekkingarvöxt.

 

Í stefnunni er kveðið á um skuldbindingu RÚV til að veita næringarríka valkosti, heilsufarsmælingar og hvatningu til hreyfingar með ýmsu móti. Reglulega á að bjóða upp á fræðsluerindi, sem miða að því að efla heilsu, og styrkja félagslega samheldni með ýmsum viðburðum. Áfram er stutt við starfsþróun, m.a. með tækifærum í gegnum EBU-samstarf.

 

Þjónusta við starfsfólk var efld, meðal annars með því að auka samstarf um sálfræðiaðstoð, markþjálfun, stjórnendaráðgjöf og ráðgjöf til að takast á við og fyrirbyggja langvarandi streitu og álagseinkenni. Heilsuvísitala starfsfólks styrktist aðeins á milli ára sem skýrist af miklum covid-tengdum veikindafjarvistum árið 2022. Yfirvinnutölur lækkuðu enn og áfram verður unnið að því að draga úr yfirvinnu eins og kostur er til að styðja við velferð starfsfólks.

 

Starfsfólk RÚV á kost á að fá íþróttastyrk og það er hvatt til vistvænna samgangna með tilboði um samgöngusamning. Á árinu var ákveðið að bjóða starfsfólki afnot af rafmagnshjóli endurgjaldslaust nokkra daga í einu til að hvetja til vistvænni samgangna til og frá vinnu. Í samræmi við markmið um vistvænar samgöngur var einnig boðið upp á hjólastillingar og yfirferð hjóla í vor.

 

Hugað var að hreyfingartengdum heilsuviðburðum með þátttöku í Lífshlaupinu, Hjólað í vinnuna og átakinu Syndum. Þátttakan eykst ár frá ári enda er starfsfólk hvatt til að vera með og eru veitt hvatningarverðlaun. Starfsfólki var boðið í spinning undir öruggri stjórn tónlistarstjórans Sigga Gunn og hópur rúvara tók þátt í hlaupi í Þórsmörk á fallegum haustdegi. Í framhaldi af því var stofnaður hlaupahópur sem hleypur saman vikulega. Nudd á vinnutíma hefur fest sig í sessi og starfsfólk hélt áfram að njóta rjúkandi fargufu. Það er vinsæll viðburður þar sem fara saman sána og sjóbað.

RÚVaralífið

Félagslífið var fjörugt á árinu. Starfsmannasamtök RÚV stóðu fyrir glæsilegri árshátíð í Hörpu í vor auk þess sem haldnir voru ýmsir viðburðir svo sem spurningakeppni, haust- og aðventugleði. Startvikunni var fagnað í haust með ýmsu uppbroti og sem fyrr tók mötuneyti RÚV virkan þátt í því með frábærum þematengdum matseðli og tilheyrandi stemningu.

 

Áralöng hefð er fyrir jólaballi í stúdíói A, sem var vel sótt fjölskylduskemmtun. Fjölskyldudagur RÚVara hefur fest sig í sessi í upphafi sumars. Þá gefst starfsfólki kostur að bjóða fjölskyldum sínum í Efstaleitið í grill og gaman. Stúdíóin eru opnuð fyrir gestum og boðið upp á söng- og leikatriði úr smiðju RÚV. Golfklúbbur RÚV var einnig virkur og þrjú vel sótt golfmót voru haldin í sumar. Konur og kvár á RÚV tóku að sjálfsögðu þátt í kvennaverkfallinu 24. okt. og fjölmenntu á baráttufund.

Þróun þekkingar

Lögð er áhersla á að byggja upp hæfni og styrkja starfsfólk í fjölbreyttum hlutverkum innan RÚV. Starfsmannasamtöl eru notuð fyrir endurgjöf og sem vettvangur til að ræða starfsþróun. Allt starfsfólk styður við mikilvægt hlutverk RÚV sem almannaþjónustumiðils sem rýnir samfélagið, segir mikilvægar sögur og þróar nýjar leiðir til miðlunar.

Rétt um 40 fræðslufundir voru haldnir á árinu. Á dagskrá voru m.a. erindi um velferðartengd efni, umhverfismál og gervigreind. Jafnréttismál skipa alltaf reglulega sess í fræðsludagskránni. Á alþjóðadegi kvenna var haldið námskeið fyrir tempraða róttæklinga, þ.e. þau sem vilja vera jákvætt hreyfiafl breytinga á vinnustaðnum. Auk þess voru haldnir nokkrir fundir þar sem starfsfólki gafst kostur á að ræða um ýmis jafnréttistengd mál. Allt árið var starfsfólki af erlendum uppruna boðið upp á einkakennslu í íslensku á vinnutíma sem einn af málfarsráðgjöfum á RÚV hefur á hendi.

 

Lagt var kapp á að bjóða upp á sem flest fræðsluerindi á fjarfundum. Lögð var áhersla á að vinna úr ábendingum starfsfólks um fræðslu til efla fagþekkingu, t.d. á einstökum kerfum og forritum. Haldin voru námskeið um hlaðvarpsgerð og miðlun efnis á Tiktok. Upplýsingaöryggisnámskeið voru fyrirferðarmikil á árinu í tengslum við upplýsingaöryggisvottun sem RÚV vinnur að.

 

Haldið var áfram með þróun rafræns fræðslukerfis þar sem starfsfólki gefst kostur á að sækja fræðsluefni þegar því hentar best. Í boði eru fjölmörg stutt og hnitmiðuð námskeið. Kerfið er mikilvæg upplýsingaveita til starfsfólks um ýmis mannauðstengd mál og gegnir þýðingarmiklu hlutverki í upplýsingum til nýrra starfsmanna.