Safnadeild RÚV

Í safni Ríkisútvarpsins er mikið magn sjónvarps- og útvarpsefnis frá upphafi útsendinga árið 1930. Óhætt er að segja að Ríkisútvarpið hafi skráð nútímasögu þjóðarinnar og að mikilvægur hluti þeirrar sögu sé geymdur í söfnum Ríkisútvarpsins. Þar á meðal eru sannkallaðar þjóðargersemar, þar sem efni af öllu tagi er varðveitt: upptökur af daglegu lífi Íslendinga á þessum tíma, upptökur frá stærstu viðburðum í sögu þjóðarinnar, ómetanlegar heimildir af merku fólki og merkum listviðburðum. Umfang þessa safnaefnis er mikið og er unnið hefur verið að því jafnt og þétt að skrá það og yfirfæra á stafrænt form. Efni úr safni hefur í auknum mæli verið dagskrársett í línulegri dagdagskrá sjónvarps og í spilara og aðgengi þannig aukið að eldri upptökum í útvarpi og sjónvarpi. Stóran hluta ársins 2020 var safnið lokað almenningi vegna COVID-19 en starfsmenn hafa skráð dagskrárefni og sinnt þjónustu við starfsfólk og almenning á heimaskrifstofum.
Á árinu var undirritaður samningur við rétthafa og allt efni í upplestri Halldórs Laxness í safni RÚV yfirfært og gert aðgengilegt almenningi í spilara.

 

• Á árinu var útbúin ný skjalageymsla sem fékk formlegt samþykki frá Þjóðskjalasafni Íslands.
• Lakkplötusafni RÚV var pakkað í sérstakar öskjur og komið fyrir í öruggum skápum.
• Elsta spjaldskrá útvarps og sjónvarps var skönnuð inn og gerð aðgengileg stafrænt á innra neti.

RÚV English

Í stefnu RÚV til 2021 er kveðið á um að bæta skuli aðgengi innflytjenda. RÚV English birtir fréttir á ensku og heldur úti vikulegum spjallþætti á ensku, The Week in Iceland, um fréttir liðinnar viku á Íslandi á RÚV.is. RÚV English heldur utan um þýðingar á völdu íslensku sjónvarpsefni sem birtist með texta á RÚV 2 og RÚV.is. Þjónusta RÚV English var aukin í faraldrinum, vel var fylgt eftir öllum upplýsingum og birtar fréttir af upplýsingafundum. Þá hélt verkefnastjóri RÚV English utan um þýðingar á pólsku og túlkun á borgarafundum og upplýsingafundum á pólsku.

Málfar

RÚV hefur ríkar skyldur við íslenskt mál og í málstefnunni er málrækt í fyrirrúmi. Málfarsráðgjafar sinna yfirlestri og ráðgjöf og stuðla þannig að því að bæta íslenskufærni og auðga málfar starfsfólks. Daglegar ábendingar og fundir um málfar eru liður í þeirri starfsemi. Umfang yfirlestrar eykst ár frá ári. Málfarsráðunautur og málfarsráðgjafar sinna líka upplýsingagjöf og fræðslu um íslenskt mál í vikulegu spjalli í Morgunútvarpinu á Rás 2, Málfarsmínútunni í Samfélaginu á Rás 1 og þættinum Orð af orði sem hefur verið á dagskrá Rásar 1 í hverri viku frá 2013.

FJÖLBREYTTUR STARFSHÓPUR

Hjá RÚV starfar fjölbreyttur hópur fólks með víðtæka reynslu og þekkingu. Á árinu 2020 störfuðu að meðaltali 288 starfsmenn í 266 stöðugildum hjá RÚV og RÚV Sölu. Starfsstöðvar eru í Reykjavík, Borgarnesi, Akureyri og á Egilstöðum. Kynjahlutfall hjá RÚV skiptist þannig að 42% starfsfólks eru konur og 58% karlar. Kynjahlutföll stjórnenda eru 39% konur og 61% karlar. Kynjahlutföll nýráðninga á árinu 2020 voru 54% konur og 46% karlar. Mikill áhugi er jafnan á starfi hjá RÚV og alls bárust yfir 1100 umsóknir á árinu.

 

VIÐBRÖGÐ VEGNA COVID-19

Viðbrögð vegna heimsfaraldursins setti mark sitt á mannauðsmál og innra starf. Starfsstöðvum var skipt í sóttvarnahólf og starfsfólk vann fjarvinnu eins og kostur var. Reyndi því töluvert á aðlögunarhæfni og nýjar lausnir. Lögð var áhersla á reglulega upplýsingamiðlun til starfsmanna á fjarfundum með útvarpsstjóra. Gefin var út fjarfundanámskrá fyrir RÚV skólann þar sem boðið var upp á fjölmarga fræðsluviðburði. Gerðar voru tvær kannanir til að mæla starfsánægju og viðbrögð við COVID-19 á vinnustaðnum. Báðar sýndu þær mjög jákvæð viðhorf starfsfólks.

 

SKÝR MARKMIÐ OG NÁKVÆM GREINING

Liður í jafnréttisvinnu RÚV er samræmd skráning á kynjahlutfalli viðmælenda sem tekin var upp 2015. Skráðir eru viðmælendur í fréttum og fréttatengdum þáttum og í reglubundnum innlendum þáttum í útvarpi og sjónvarpi. Talning sem þessi gefur ekki heildarmynd af því hver birtingarmynd karla og kvenna er í dagskránni en hún er mikilvægur liður í því að mæla hver staðan og þróunin er.
RÚV setti sér skýr markmið um að ná jafnvægi milli kynja í hópi viðmælenda. Markmiðið er að það séu algerlega jöfn kynjahlutföll í allri dagskrá allra miðla, að tekin séu viðtöl við jafnmargar konur og karla. Fréttir endurspegla samfélagið sem við búum í og í því samfélagi er því miður ekki enn jafnvægi á milli kynja í valdastöðum, til að mynda í stjórnmálum og stjórnunarstöðum í atvinnulífinu. Því þótti óraunsætt að setja jafn ströng viðmið fyrir fréttir og aðra dagskrá.

JAFNVÆGI MILLI KYNJA Í DAGSKRÁ RÚV 2020

Skráðir eru viðmælendur í fréttum og fréttatengdum þáttum og í reglubundnum innlendum þáttum í útvarpi og sjónvarpi. Talning sem þessi gefur ekki heildarmynd af því hver birtingarmynd karla og kvenna er í dagskránni en hún er mikilvægur liður í því að mæla hver staðan og þróunin er.

Hlutfall kynjanna í dagskrá RÚV, utan frétta, var alveg jafnt, 50% karlar og 50% konur. Með kynjajafnvægi í dagskrá sker RÚV sig frá flestum miðlum hérlendis og erlendis. Séu eingöngu fréttatímar og fréttatengdir þættir teknir saman er hlutfall viðmælenda 63% karlar og 37% konur. Það skýrist af hærra hlutfalli karla í leiðandi stöðum í stjórnmálum og samfélaginu, sem fluttar eru fréttir af.  Tölurnar hafa þróast í átt til jafnvægis frá því að mælingar hófust.

 

JAFNLAUNAVOTTUN

Stjórnendur hafa einnig unnið markvisst að því að eyða út óútskýrðum launamun sem er nú kominn vel undir 2% og hlaut RÚV gullmerki jafnlaunaúttektar PwC vorið 2016, fyrst fjölmiðla. Jafnlaunakerfi hefur verið byggt upp og RÚV hlaut í kjölfar þess jafnlaunavottun og heimild Jafnréttisstofu til að nota jafnlaunamerkið.