Aukin markaðshlutdeild Rásar 1  

Rás 1 hefur verið á mikilli siglingu undanfarin ár eftir að breytingar hafa verið gerðar á dagskrárramma og dagskrárframboði. Sömuleiðis hefur orðið talsverð endurnýjun í starfsmannahópnum þar sem hópur af ungu dagskrárgerðarfólki hefur verið ráðinn til starfa. Þessar breytingar hafa skilað sér í því að hlustun hefur aukist um þriðjung á línulega dagskrá og Rás 1 á iðulega nokkur af vinsælustu hlaðvörpum landsins í hverri viku. Þáttur Veru Illugadóttur, Í ljósi sögunnar, hefur reyndar verið langvinsælasta hlaðvarp landsins síðustu 3-4 ár og var Vera valinn vinsælasti útvarpsmaður landsins í byrjun árs. Á árinu bættust Heimskviður á þennan lista útvarpsþátta Rásar 1 sem hafa gert það gott, bæði í línulegri dagskrá og sem hlaðvarp. Umsjónvarmenn þáttarins eru Guðmundur Björn Þorbjörnsson og Birta Björnsdóttir en hann er afrakstur samstarfs Rásar 1 og fréttastofu RÚV. Þáttur Önnu Marsibiljar Clausen, Grár köttur, naut einnig talsverðra vinsælda á fyrri hluta síðast árs og sömuleiðis Skyndibitinn í umsjón Önnu Gyðu Sigurgísladóttur. Allir þessir þættir eru dæmi um dagskrárgerð sem sérstaklega er hugsuð með ólínulega hlustun í huga. Þeir eru sértækir að efni og byggja allir á spennandi og fjölbreyttri hljóðmynd. Hið sama má segja um ýmsar þáttaraðir sem framleiddar voru á árinu, svo sem Ég segi ekki alltaf allt gott, Börn tímans, Blindfull á sólríkum degi, Spekileki, Hyldýpi, Fallnar borgir, Listin að brenna bækur, Völuspá, Ymur II og Loftslagsþerapían en fyrir þá síðastnefndu var Arnhildur Hálfdanardóttir, dagskrárgerðar- og fréttakona, tilnefnd til Blaðamannaverðlaunanna.

Mikil og markviss vinna var lögð í að gera hátíðardagskrá Rásar 1 sem veglegasta enda gegnir þessi útvarpsstöð sjaldan jafn stóru hlutverki í lífi landsmanna og um hátíðir. Hlustun á Rás 1 er aldrei meiri en um páska og jól. Gætt hefur verið að því að gera hátíðarþætti aðgengilega í Spilara RÚV og á hlaðvarpi, meðal annars með því að setja þá alla í eitt og sama Hlaðvarpið, sem gengur undir nafninu Fríhöfn Rásar 1, en það er einnig aðgengilegt í Spilaranum. Eins og undanfarin ár hafa nýir bókmenntalestrar Rásar 1 einnig verið aðgengilegir í hlaðvarpi.

Ekki voru gerðar miklar breytingar á dagskrárramma Rásar 1 á árinu. Innra starf miðaði meira að því að styrkja dagskrárgerðina, efni og efnistök í þeim þáttum sem eru á dagskránni. Í daglegri dagskrá var miðað að því að hafa efni sem höfðar til breiðs hóps hlustenda. Samfélagslegri og fréttatengdri umræðu er sinnt í daglegum þáttum á borð við Morgunvaktina, Mannlega þáttinn, Samfélagið og Speglinum. Menningarlegu efni er sinnt í Víðsjá, Lestinni, Lestarklefanum, Hátalaranum, Á tónsviðinu og fleiri þáttum. Og mannlífstengt efni er í Segðu mér, Gestaboði og Mannlega þættinum svo dæmi séu nefnd. Og þótt finna megi efni tengt landsbyggðinni í flestum föstu þáttunum er þeim sérstaklega sinnt í Sögum af landi. Á þessu ári urðu þau tímamót að ráðinn var sérstakur dagskrárgerðarmaður útvarps sem staðsettur er á starfsstöð RÚV á Akureyri og sér sá starfsmaður um þáttagerðina ásamt öðru. Um helgar eru sértækari þættir, svo sem Orð um bækur, Flakk, sem nú heldur úti sérhæfðari umræðu um byggingarlist en áður, Tónlist frá a-ö, sem hóf göngu sína í byrjun árs, Bók vikunnar, Orð af orði, sem fjallar um íslenska tungu, Frjálsar hendur og Samtalið þar sem Ævar Kjartansson stýrir ásamt völdum sérfræðingum umræðum um hugmyndaleg efni, stjórnmálaleg, söguleg og samfélagsleg.

Fjölbreytt tónlistardagskrá

Tónlist er mikilvægur hluti af dagskrá Rásar 1 og kemur við sögu í flestum dagskrárliðum. Árið 2019 voru á dagskrá tónlistarþættir, þar sem umsjónarmenn kynntu tónlist af ýmsu tagi, nýjar tónleikahljóðritanir, bæði innlendar og erlendar og hljóðrit gerð sérstaklega fyrir Ríkisútvarpið, bæði ný og úr safni.

Einn mikilvægasti liðurinn í tónlistardagskrá Rásar 1 er hljóðritun á tónlist. Með beinum útsendingum frá tónleikum Sinfóníuhljómsveitar Íslands og útsendingum frá ýmsum tónlistarhátíðum og sýningum Íslensku óperunnar gegnir Rás 1 lykilhlutverki við miðlun tónlistar til allra landsmanna. Auk Sinfóníuhljómsveitar Íslands er Rás 1 í samstarfi um hljóðritanir við Stórsveit Reykjavíkur og Sinfóníuhljómsveit Norðurlands, tónlistarhátíðirnar Myrka músíkdaga, Reykjavík Midsummer Music, Kirkjulistahátíð í Hallgrímskirkju, Reykholtshátíð og Sumartónleika í Skálholti.

Enn fremur má nefna tónleika Kammersveitar Reykjavíkur, tónleika úr Tíbrárröð Salarins í Kópavogi, tónleika Kammermúsíkklúbbsins, Kúnstpásu Íslensku óperunnar, Sönghátíð í Hafnarborg, tónleika í tónleikaröð Hörpu Sígildum sunnudögum, tónleika á Alþjóðlegu orgelsumri í Hallgrímskirkju og tónleikahljóðritanir frá Þjóðlagahátíðinni á Siglufirði.

Sígild- og samtímatónlist er í öndvegi í tónlistardagskrá Rásar 1, en einnig djass og dægurlög fyrri tíðar og það sem skarar fram úr í nýrri tónlist af öllum gerðum hérlendis sem erlendis. Rás 1 leitast við að að upplýsa og fræða hlustendur um sögu tónlistar og strauma og stefnur í samtímanum og þar gegna þættir á borð við Víðsjá og Lestina mikilvægu hlutverki og einnig má nefna þáttaraðirnar Hátalarann í umsjón Péturs Grétarssonar, Ym í umsjón Friðriks Margrétar Guðmundssonar, þætti Unu Margrétar Jónsdóttur Á tónsviðinu og þáttum Arndísar Bjarkar Ásgeirsdóttur Tónlistin frá a-ö.

Í nóvember stóð Rás 1 í þriðja sinn fyrir sinni eigin tónlistarhátíð, í þetta sinn undir listrænni stjórn Daníels Bjarnasonar. Þar frumflutti Strokkvartettinn Siggi fjögur ný kammerverk sem pöntuð voru sérstaklega af þessu tilefni og styrkt af Tónskáldasjóði Ríkisútvarpsins og STEF en einnig tóku söngkonurnar Hildigunnur Einarsdóttir og Ingibjörg Fríða Helgadóttir þátt í flutningnum. Tónskáldin völdu hvert sitt ljóðskáld til samvinnu en verkin fjögur voru Klakabrennur II eftir Ingibjörgu Ýri Skarphéðinsdóttur við texta Sigurbjargar Þrastardóttur, Stefnumót við sjálfið eftir Pál Ragnar Pálsson við texta Ásdísar Sifjar Gunnarsdóttur, Skrauthvörf eftir Kjartan Holm við texta Jóhannesar Ólafssonar og Umfang eftir Maríu Huld Markan Sigfúsdóttur við texta eftir Kristínu Eiríksdóttur.

Samstarf við Samband evrópskra útvarpsstöðva (EBU) er þýðingarmikill þáttur í tónlistardagskrá Rásar 1 og hafa hlustendur notið þessa samstarfs í reglulegum útsendingum. Ríkisútvarpið og íslenskt tónlistarlíf hafa með þessu samstarfi verið virkir þátttakendur í frjóu samfélagi evrópsks tónlistarlífs því hljóðritanir Ríkisútvarpsins standa öðrum Evrópuútvarpsstöðvum til boða auk þess sem Ríkisútvarpið hefur verið þátttakandi í alþjóðlegum samsendingum til milljóna hlustenda um allan heim, til dæmis á árlegum tónleikadögum EBU. Þess má geta að tónleikar Schola cantorum sem voru framlag Ríkisútvarpsins til jólatónleikadags EBU 2019 voru sendir út í jóladagskrá 17 aðilardarstöðva, þar á meðal BBC, austurríska útvarpsins, Deutschland Kultur, spænska útvarpsins, ríkisútvarpsstöðva allra norrænu landanna, kanadíska útvarpsins og ástralska útvarpsins. Tónleikahljóðritunum frá helstu tónlistarhúsum Evrópu var útvarpað í þáttunum Endurómi úr Evrópu auk þess sem nýjar hljóðritanir frá Metrópólitan-óerunni í New York og helstu óperuhúsum Evrópu hljómuðu reglulega.

Í júlí og ágúst bauð Rás 1 hlustendum sínum að slást í hóp tónleikagesta á hinum fjölmörgu tónlistarhátíðum sem haldnar eru vítt og breitt um Evrópu á sumrin.

Á meðal hátíða sem útvarpað var frá að þessu sinni má nefna Mozart-hátíðina í Würtzburg, Naantali-tónlistarhátíðina í Finnlandi, Aldeburgh-hátíðina á Englandi, SOLsberg-hátíðina í Sviss, Varna-tónlistarhátíðina í Búlgaríu, RheinVokal-hátíðina í Þýskalandi, Risør-kammertónlistarhátíðina í Noregi, Schubert-hátíðina í Schwartzenberg, tónlistarhátíðina í Granada og Verbier-hátíðina í Sviss að ógleymdri Proms-hátíðinni, sumartónlistarhátíð breska útvarpsins.

Sígild- og samtímatónlist í öndvegi

Rás 1 styður við íslenska samtímatónlist með ýmsum hætti, meðal annars með upptökum og tónleikahljóðritunum ýmiss konar. Frumflutningur á Jólalagi Ríkisútvarpsins sem Rás 1 pantar á hverju ári af íslensku tónskáldi er löngu orðin að skemmtilegri hefð í jóladagskránni. Jólalagið 2019 var eftir Hafliða Hallgrímsson, frumflutt af Schola cantorum og Herði Áskelssyni í beinni útsendingu á jólatónleikadegi EBU. Rás 1 hefur tekið þátt í Alþjóðlega tónskáldaþinginu (International Rostrum of Composers) um áratuga skeið en þingið er einn öflugasti vettvangur til kynningar á íslenskri samtímatónlist. Alþjóðlega tónskáldaþingið 2019 fór fram í Bariloce í Patagóníu í maí og var það í fyrsta sinn sem þingið var haldið utan Evrópu. Fulltrúi Rásar 1 var Arndís Björk Ásgeirsdóttir sem kynnti þar tvö ný íslensk verk, Dust eftir Valgeir Sigurðsson sem samið var að beiðni RÚV fyrir Tónlistarhátíð Rásar 1 2018 og verkið O eftir Ingibjörgu Ýri Skarphéðinsdóttur. Verk Valgeirs lenti á úrvalslista yfir tíu áhugaverðustu verk þingsins og var í kjölfarið útvarpað til milljóna hlustenda. Úrvali verka frá Tónskáldaþinginu var útvarpað í tveimur þáttum í nóvember en þar fékk Arndís Björk þriðja árs tónsmíðanema Listaháskóla Íslands til liðs við sig til að ræða um verkin.

Tónlistin er líka félagi og skemmtun og miða vinsælustu þættir Rásar 1  að því að skapa þægilega nærveru með góðri tónlist sem oft heyrist ekki annars staðar. Má þar nefna hinn vinsæla þátt Á reki með KK þar sem Kristján Kristjánsson leikur tónlist af ýmsu tagi og þátt Svanhildar Jakobsdóttur, Óskastund.

Útvarpsleikhúsið frumflutti sex verk ásamt meiru

Útvarpsleikhúsið framleiðir útvarpsleikrit og heimildaverk, í flestum tilvikum eftir sviðslistafólk. Á árinu 2019 voru frumflutt sex verk, stök verk, framhaldsverk og heimildaseríur. Má þar nefna SOL, framhaldsleikrit í fjórum hlutum eftir Tryggva Gunnarsson og Hilmi Jensson sem flutt var um páskana en verkið hlaut Grímuverðlaunin í flokki útvarpsverka. Einnig var SOL tilnefnt til Grímuverðlauna í flokknum Leikrit ársins og er það í fyrsta sinn sem útvarpsleikrit hlýtur tilnefningu í þeim flokki. SOL var svo tilnefnt til evrópsku ljósvakaverðlaunanna Prix Europa og varð í þriðja sæti í flokki framhaldsleikrita fyrir útvarp. Árið 2017 var undirritaður samstarfssamningur til þriggja ára við Sviðslistadeild Listaháskóla Íslands og var annað verkefnið skv. þeim samningi framleitt á árinu en það var nýtt verk eftir Sölku Guðmundsdóttur, Sjöunda nóttin, sem skrifað var sérstaklega fyrir útskriftarárgang leikarabrautar. Einnig mætti nefna jólaleikrit Útvarpsleikhússins, Litlu jólin,  verk í tveimur hlutum eftir leikhópinn Kriðpleir (Bjarni Jónsson, Árni Vilhjálmsson, Friðgeir Einarsson og Ragnar Ísleifur Bragason).

Áherslubreytingar á Rás 2 hafa skilað góðum árangri og árið 2019 var fyrsta árið frá 2012 þar sem hlustun jókst milli ára. Stöðin hefur styrkt sig hjá yngri hlustendum sem meðal annars má rekja til markvissari tónlistarstefnu og yngra dagskrárgerðarfólks. Áfram er lögð áhersla á íslenska tónlist sem hefur ávallt verið þungamiðja í starfi Rásar 2. Mikilvægi stöðvarinnar þegar kemur að fréttum kom svo vel í ljós í desember þegar óveður gekk yfir landið. 

Íslensk tónlist í öndvegi 

Rúmur helmingur af allri tónlist sem flutt er á Rás 2 er íslensk. Þetta eykur sérstöðu stöðvarinnar sem í hverri viku frumflytur fjölmörg lög eftir íslenskt listafólk. Undiraldan er nú tvisvar í viku en þar er eingöngu spiluð ný íslensk tónlist. Árið 2019 voru um 600 lög frumflutt í þættinum. Þá má nefna að 45 íslenskar hljómsveitir komu í Stúdíó 12 og spiluðu 140 íslensk lög. Fimmtíu nýjar plötur fengu kynningu í Plötu vikunnar en þar var hlutfall kynjanna jafnt. Einnig má nefna að hátt í 50 ný jólalög bárust í jólalagakeppni Rásar 2. Skúrinn er aftur farinn af stað með nýjum stjórnendum en þátturinn hefur góða tengingu við Músíktilraunir og leggur áherslu á nýtt og ungt tónlistarfólk. 

Fjölmargar beinar útsendingar voru á árinu frá íslenskum tónlistarviðburðum. Má þar nefna Aldrei fór ég suður, Bræðsluna, Ljósanótt, Heima í Hafnarfirði, Blúshátíð í Reykjavík og Akureyrarvöku. Samstarfið við Iceland Airwaves cvar endurnýjað en hápunkturinn árið 2019 var bein útsending frá tónleikum Of Monsters and Men en þeim var síðar dreift um alla Evrópu í gegnum samstarf okkar innan EBU. Í gegnum það hafa fjölmargir íslenskir listamenn fengið ómetanlega kynningu á erlendum vettvangi og óhætt að segja að það eigi sinn þátt í velgengi íslensku tónlistarútrásarinnar. Hátt í 100 tónleikar voru hljóðritaðir árið 2019 en þar hefur Rás 2 algjöra sérstöðu meðal íslenskra útvarpsstöðva. 

Tónaflóð á Menningarnótt 

Tónaflóð er nú skilgreint af borgaryfirvöldum sem hápunktur Menningarnætur. Dagskráin í ár var sérlega vel heppnuð sem og útsendingin frá viðburðinum. Tugir þúsunda fylgdust með á Arnarhóli og áhorf í sjónvarpi var mikið. Dagskrá ársins var einstaklega góð blanda af gömlu og nýju. RÚV núll bauð upp á ClubDub sem er afal vinsæl meðal yngri kynslóðanna. Auður og GDRN hafa bæði stimplað sig rækilega inn í íslenskt tónlistarlíf og í kjölfarið kom Vök sem er með áhugaverðari tónleikaböndum landsins. Valdimar og Hjaltalín fylgdu í kjölfarið og Stjórnin lokaði svo kvöldinu með glæsibrag. 

Krókurinn 

Menningarverðlaun Rásar 2 nefnast Krókurinn og eru afhent þeim listamanni sem talinn er hafa skarað framúr í lifandi flutningi á árinu. Handhafi Króksins 2019 var Bubbi Morthens en hann gaf út nýja plötu á árinu sem féll í góðan jarðveg.  

Konur í tónlist 

Rás 2 hefur á síðustu árum lagt sífellt meiri áherslu á að jafna hlut kynjanna í dagskrá og dagskrárgerð. Tónlist eftir konur á víðast hvar undir högg að sækja og konur eru mun fámennari meðal höfunda, bæði á Íslandi og erlendis. Þeirri þróun verður ekki snúið við á einu ári en ein leið til að rétta þessa skekkju er að vekja meiri athygli á þeirri tónlist eftir konur sem gefin er út. Árið 2019 var tónlist eftir konur eða þar sem konur eru flytjendur um 40% af allri tónlist stöðvarinnar. Eldri tónlist skekkir myndina en þegar kemur að nýrri tónlist er hlutfallið nánast jafnt. 

Þar fyrir utan hefur átak verið gert á síðustu tveimur árum þegar kemur að hlut kvenna í dagkskrárgerð. Þær hafa aldrei verið fleiri á Rás 2 og gegna fjölbreyttum hlutverkum, rétt eins og karlar. Tónlistarumfjöllun var lengi nær eingöngu í höndum karla en það hefur breyst og er nú annar umsjónarmaður Popplands kona.  

Rás 2 gegnir mikilvægu fréttahlutverki 

Þegar óveður gekk yfir landið í desember jókst hlustun mikið á Rás 2. Fréttir á heila tímanum fengu mikla hlustun en þess á milli miðlaði dagskrárgerðarfólk Rásar 2 nýjustu fréttum um leið og þær bárust. Þessa viku varð Rás 2 vinsælasta útvarpsstöð landsins sem sýnir að þegar mikið liggur við er hún enn sú stöð sem fólkið í landinu stillir á til að fá nýjustu upplýsingar. Rás 2 er því mikilvægur hlekkur í almannavarnarhlutverki RÚV. 

Vefvinnsla fréttastofunnar

Fréttastofa RÚV hefur lagt áherslu á að birta ítarlegar fréttir á RÚV.is, dreifa þeim þannig að sem flestir sjái og reynt að ná til enn breiðari hóps notenda. Á vefnum birtast allar fréttir sem framleiddar eru á fréttastofunni, hvort sem það er fyrir sjónvarp, útvarp eða sérstaklega fyrir vef. Markmiðið er að vinnsla frétta og framsetning sé fjölbreytt þannig að fréttamenn geti valið þann miðil sem hentar best hverju sinni til þess að koma frásögnum sem best og sem fyrst til skila til notenda. Fjöldi myndskeiða og hljóðklippa var aukinn sem skilaði sér í því að notendur dvelja lengur á vefnum.

Á síðasta ári jók fréttastofan fjölda færslna á samfélagsmiðla til muna. Mun fleiri færslur sem birtast á ruv.is enda á Facebook- og Twitter-reikningum fréttastofunnar og það hefur skilað aukningu í fjölda heimsókna á vefinn. Tíðari færslur á samfélagsmiðlum hefur einnig haft greinileg áhrif á fjölda þeirra sem fylgja fréttastofunni.

Haustið 2019 tók fréttastofan við Instagram-reikningi fréttastofunnar sem hafði verið í fóstri hjá vefútgáfunni, með það að markmiði að dreifa fleiri fréttum þar, ná til breiðari hóps og vekja athygli á helstu fréttamálum líðandi stundar.

Fjöldi flettinga frétta á vef RÚV jókst um ríflega átta prósent á milli ára. Fjöldi flettinga notenda sem komu af samfélagsmiðlum jókst hins vegar um tæplega 14 prósent á milli ára. Notendur dvöldu að jafnaði fjögur prósentum lengur á vefnum en árið 2018.

Enn er lögð áhersla á fleiri myndskeið sem framleidd eru fyrir vefinn og beinar útsendingar. Stefnumótun fyrir myndskeið og beinar útsendingar hefur verið unnin og kemur til framkvæmda á næsta ári.

Kveikur 

Fréttaskýringaþátturinn Kveikur lauk öðru starfsári sínu í vor með því meðal annars að fletta ofan af svikum bílaleigunnar Procar, skyggnast inn í heim vændis á Íslandi og fara á slóðir Hauks Hilmarssonar í Sýrlandi. Markmið þáttarins er að kafa dýpra ofan í mikilvæg mál, rannsaka, varpa ljósi á og setja í samhengi. Hvort sem það er rannsókn á áhrifum höfuðhögga í íþróttum, umfangsmikil landakaup, Hvalárvirkjun eða umsvif Samherja í Namibíu og háar peningagreiðslur fyrirtækisins til stjórnmálamanna þar í landi. Umfjöllun Kveiks hefur vakið verðskuldaða athygli og hlotið Eddu-verðlaun tvö ár í röð. Þátturinn hefur margsannað mikilvægi sitt og er leiðandi í þeirri fréttamennsku sem rannsakar og veitir aðhald.

Um landið og út í heim

Það var í nógu að snúast hjá fréttamönnum og myndatökumenn RÚV við fréttavinnslu í öllum landshlutum á liðnu ári. Flestir starfsmenn RÚV á landsbyggðinni eru á Akureyri og fjölgaði um einn á árinu en starfsstöðvar eru einnig á Egilsstöðum, í Borgarnesi og á Ísafirði. Þá eru reglulega farnar sérstakar fréttaöflunarferðir um Suðurland og Suðurnes.

Á erlendum vettvangi heimsóttu fréttateymi RÚV meðal annars Pólland vegna þingkosninga þar í landi, fluttu fréttir frá Dyflinni þegar leit stóð yfir  að týndum Íslendingi og heimsóttu Ísrael þegar Eurovision-söngvakeppnin var haldin og fjölluðu um hernumdu svæði Ísraela, aðbúnað Palestínumanna og deilur þjóðanna. Þá fjallaði fréttastofan um finnsk stjórnmál af vettvangi og fylgi forsætisráðherra Íslands á leiðtogafund NATO í Brussel.

Borgarafundir

Eitt af hlutverkum RÚV er að efna til samtals við þjóðina um mál sem hana varða og eiga frumkvæði að því að fólkið í landinu fái tækifæri til að taka þátt í umræðunni. Borgarafundir fréttastofunnar hafa aldrei verið fleiri en árið 2019. Í mars var fjallað um geðheilbrigðismál ungmenna, málefni eldri borgara voru til umfjöllunar í byrjun október og loftslagsmálin í nóvember. Borgarafundir í beinni útsendingu í sjónvarpssal hafa fest sig í sessi sem mikilvægaleið til að gefa almenningi aðgang í umræðum í sjónvarpi.

Sunnudagsskýringar í sjónvarpi

Eitt af markmiðum fréttastofunnar er að fjölga almennum fréttaskýringum og ítarefni í öllum miðlum sínum þar sem kafað er aðeins dýpra í ýmiss mál sem fréttaflaumur dagsins veitir ekki svigrúm til. Haustið 2019 var ákveðið að lengja sjónvarpsfréttir á sunnudögum um fimm mínútur og setja á dagskrá fréttaskýringar þar sem málum er gefinn lengri vinnslutími og svigrúm í fréttatímanum. Málin eru af ýmsum toga. Fjallað hefur verið um aukið fíkniefnasmygl til landsins, samgöngur og Brexit, svo fátt eitt sé nefnt.

Heimskviður í hlaðvarpi og útvarpi

Rás 1 og fréttastofan töku höndum saman á árinu í vikulegum hlaðvarpsþætti sem einnig er á dagskrá útvarps. Þátturinn kom til móts við mikla eftirspurn eftir áhugaverðum og aðgengilegum fréttaskýringum af erlendum vettvangi. Heimskviður hafa slegið í gegn í hlaðvarpinu sem og í útvarpinu.

Náttúruvá 

Ein af grunnskyldum RÚV er fólgin í almannavarnahlutverki fréttastofunnar og á árinu má segja að veðrið hafi verið í óvenju stóru hlutverki. Sögulegt óveður skall á um allt land í desember og hafði víðtæk áhrif á innviði landsins. Fréttateymi RÚV stóð vaktina dögum saman um allt land og flutti linnulítið fréttir á ástandinu á vefnum, í útvarpi og í sjónvarpi. Veðurhamurinn og frækileg afrek björgunarsveita um allt land voru slík að björgunarsveitirnar voru valdar maður ársins á Rás 2 á gamlársdag. Áhrif aðventustormsins voru mikil og óhætt að segja að allar helstu stoðir almannavarna og innviða landsins geti dregið lærdóm af.

Spegillinn

Spegillinn er rótgróinn fréttaskýringaþáttur í útvarpi, sem upplýsir hlustendur Rásar 1 og 2 alla virka daga. Hann kom víða við í umfjöllun sinni árið 2019. Þátturinn beindi sjónum sínum að umhverfismálum, efnahagsmálum og stjórnmálum, á innlendum sem erlendum vettvangi og heilbrigðismálum og samfélagsmálum hvers konar.

Kastljós

Beittur fréttatengdur viðtalsþáttur fjóra daga vikunnar þar sem málefni líðandi stundar eru rædd í beinni útsendingu. Viðtöl sem vekja athygli og umræðu í samfélaginu. Skeleggir og þrautreyndir spyrlar krefja ráðamenn, forstjóra og aðra valdahafa svara við spurningum sem brenna á þjóðinni.

Íþróttadeild RÚV 

RÚV aðhylltist áfram þá stefnu þegar að íþróttaþjónustu kom að fylgja eftir afreksfólki Íslands og senda út íþróttaefni sem sameinar íslensku þjóðina. Það var fjölbreytnin höfð í hávegi og leitast við að sýna allar mögulegar hliðar á íslensku íþróttalífi. RÚV leggur að auki mikla áherslu á íþróttaiðkun beggja kynja og ólíkra hópa, á öllum aldri og vill þannig bæði í senn stuðla að aukinni og reglubundinni íþróttaiðkun og skrásetja og varðveita íþróttasögu þjóðarinnar.

Heimsmeistaramót kvenna og karla í handbolta

RÚV sýndi beint frá Heimsmeistaramóti karla í handbolta í janúar. Íslenska landsliðið lék átta leiki á mótinu og endaði í ellefta sæti. Sem fyrr var mikill áhuga íslensku þjóðarinnar á “strákunum okkar” og áhorfið með því mesta sem mælst hefur á íþróttaviðburði í sjónvarpi á Íslandi. Danmörk varð heimsmeistari í fyrsta sinn eftir sigur á Noregi í úrslitaleik mótsins. RÚV sýndi alls fjörtíu leiki í beinni útsendingu auk HM stofu fyrir og eftir leiki Íslands sem og úrslitaleik mótsins. Þá sýndi RÚV frá HM kvenna í handbolta í desember en því miður komst íslenska kvennalandsliðið ekki á mótið. Þrátt fyrir það sýndi RÚV þrjátíu leiki í beinni útsendingu frá mótinu sem að þessu sinni var haldið í Japan.

Undankeppni EM kvenna og karla í knattspyrnu

Íslenska karlalandsliðið í knattspyrnu lék tíu leiki í undankeppni EM 2020 í fótbolta og voru allir leikir í beinni útsendingu á RÚV. Útsendingar frá heimalandsleikjum Íslands eru gríðarlega umfangsmiklar enda kröfur um gæði sjónvarpsútsendinga frá evrópska knattspyrnusambandsins strangar. RÚV fékk mjög góða umsögn og gæðastimpil frá evrópska knattspyrnusambandinu fyrir útsendingarnar. Enn og aftur sannaði íþróttadeild RÚV styrk sinn og getu til senda út beinar útsendingar frá stórum íþróttaviðburðum. Íslenska kvennalandsliðið í knattspyrnu byrjaði undankeppnina af krafti en liðið vann alla þrjá leiki sína á árinu og RÚV sýndi beint frá leik Lettlands og Íslands í október. Liðið stendur því vel að vígi á leið sinni í lokamót Evrópumótsins 2021 en undankeppninni lýkur í september 2020 með útileik gegn sterku liði Svía. Sá leikur verður í beinni útsendingu á RÚV.

Heimsmeistaramót og Evrópumót

RÚV gerði hinum ýmsu heimsmeistaramótum góð skil á árinu og fylgdi eftir afreksfólki okkar Íslendinga. RÚV sýndi beint frá HM í sundi í Suður-Kóreu í sumar þar sem sundkappinn Anton Sveinn McKee náði bestum árangri íslenskra keppenda. Hann varð um leið fyrstur Íslendinga til að ná Ólympíulágmarki og mun keppa á sínum þriðju Ólympíuleikum sem verða í beinni útsending á RÚV 2020. Anton fór svo á kostum á Evrópumótinu í 25 metra laug í desember og stakk sér varla til sunds öðruvísi en að setja Íslandsmet. RÚV sýnd beint frá öllum keppnisdögunum í beinni útsendingu. RÚV sýndi beint frá heimsmeistaramótinu í áhaldafimleikum í Stuttgart þar sem þrír Íslendingar voru með þátttakenda. Engum Íslendingi tókst því að komast í úrslit HM og jafnframt ljóst að enginn fimleikamaður mun keppa fyrir Ísland á Ólympíuleikunum á næsta ári. Bandaríska fimleikakonan, Simone Biles, var stjarna mótsins en hún vann til fimm gullverðlauna og sannaði að hún er ein öflugasta íþróttakona heims um þessar mundir.

Þá sýndi RÚV beint frá HM í frjálsíþróttum þar sem kringlukastarinn Guðni Valur Guðnason var meðal keppenda. Heimsmeistaramót íslenska hestsins var haldið í Berlín og RÚV var á staðnum með samantektarþætti og daglegan fréttaflutning frá mótinu. Jóhann Rúnar Skúlason fór á kostum á mótinu og varð þrefaldur heimsmeistari auk þess sem Ísland stóð uppi sem stigahæsta landsliðið.

Heimsmeistaramót kvenna í knattspyrnu

RÚV sýnt beint frá öllum leikjum á HM kvenna í knattspyrnu auk veglegri HM stofu fyrir og eftir stærstu leiki mótsins. Bandaríkin varði heimsmeistaratitil sinn eftir 2-0 sigur gegn Holland í úrslitaleiks mótsins í Lyon í Frakklandi. Mótið var einstaklega vel heppnað á RÚV og áhugi á kvennaknattspyrnu hefur aldrei verið meiri um allan heim. Samkvæmt tölum frá alþjóðaknattspyrnunni, FIFA, þá hafa aldrei fleiri horft á HM kvenna í fótbolta. Áhorfið var líka mjög gott hér á Íslandi þrátt fyrir að íslenska kvennalandslið var ekki með þátttökuþjóða að þessu sinni.

Íslandsmót, bikarúrslit og stórir viðburðir

RÚV hélt áfram að sýna frá Íslandsmótum og bikarúrslitum í hinu ýmsu íþróttagreinum í veglegri umgjörð. Meðal þess fjallað var um í beinum útsendingum var Íslandsmótið í golfi, Íslandsmótið í fimleikum, Íslandsmótið í sundi, bikarúrslit í blaki, bikarúrslit í handbolta, bikarúrslit í körfubolta og Reykjavík Crossfit Championship. Þá voru Reykjavíkurleikarnir á dagskrá RÚV í byrjun árs þar sem sýnt var frá tólf íþróttaburðum. Flest af besta íþróttafólki okkar var með þátttakenda auk á fimmta hundrað erlendra gesta. Þá var Skólahreysti og Meistaradagar á sínum stað á dagskrá RÚV. Skólahreysti bar sigur úr bítum í flokknum barna- og unglingaþáttur í sjónvarpi annað árið í röð á Sögur – verðlaunahátíð barnanna þar sem um 2.000 börn á aldrinum 6-12 ára kusu Skólahreysti besta á sviði sjónvarps. Íþróttaárinu lauk svo með veglegri útsendingu frá kjöri á íþróttamanni ársins og verðlaun sérsambanda. Eins og undanfarin ár hafa landsmenn mikinn áhuga á þessum viðburði sem skilaði sér í góðum áhorfstölum og því hæsta sem mælist í jóladagskrá RÚV á hverju ári.

Íþróttir á sunnudegi

Íþróttadeild RÚV hélt áfram að segja sögur af íþróttafólkinu okkar. Lengri útgáfa af íþróttafréttum á sunnudögum hóf göngu sína á haustdögum en þar var áherslan lögð á að veita áhugaverða innsýn í allar mögulegar hliðar á íslensku íþróttalífi. Viðtökur hafa ekki látið á sér standa en oftar en ekki eru þessar sögur þær mest lesnu á íþróttavef RÚV.

Viðtæk þjónusta við börn og unglinga 

Mikil áhersla er lögð á framleiðslu innlends barnaefnis. Gæði og framboð innlends barnaefnis endurspeglast ekki síst í KrakkaRÚV sem er yfirheiti yfir alla þjónustu RÚV við börn. Kjarninn í starfseminni er vefurinn KrakkaRÚV.is þar sem nálgast má allt innlent barnaefni RÚV, gamalt og nýtt, fjölda myndskeiða úr safni sjónvarps og talsettar teiknimyndir ásamt vönduðum útvarpsþáttum fyrir börn. Jafnframt er lögð mikið áhersla á samstarf við stofnanir sem vinna í þágu barna.  

Stundin okkar

Árið 2019 skiptist í tvennt hjá Stundinni okkar. Frá janúar til maí kepptu krakkar alls staðar að á landinu í Kveikt’á perunni og kynntust þjóðsögum, náttúruundrum og landinu okkar á skemmtilegan hátt í Leiðangrinum, smáseríu í ratleiksformi. Auk þess voru til dæmis sýndar stuttmyndir eftir krakka og fylgst með framleiðslu þeirra. 

Í október tóku nýir þáttastjórnendur við sem ákváðu að setja stjórnina alfarið í hendur krakka svo að þessi elsti þáttur RÚV gæti orðið Stundin þeirra að sönnu. Þátturinn er enn byggður upp í smáseríuformi og íslensku máli, vísindum, sköpun og umhverfisvernd eru gerð góð skil og að sjálfsögðu allt á forsendum krakka. Í vinnslu er spennandi leikin smásería sem hófst í febrúar 2020: Rammvillt í Reykjavík sem án efa heillar unga áhorfendur.   

Jólastundin 2019 var með öðru sniði en verið hefur. Nú var þátturinn sýndur að kvöldi til og var hugsaður fyrir alla fjölskylduna. Björgvin Franz leiddi okkur í gegnum ævintýralega fjölskylduskemmtun. Við hittum Kugg, Málfríði og mömmu hennar, leikin af Eddu Björgvins, Ilmi Kristjánsdóttur og Auðunni Sölva Hugasyni. Sögurnar um Kugg, Málfríði og mömmu hennar, eftir Sigrúnu Eldjárn, eru löngu orðnar klassískar og sagan í þættinum byggist á bókinni Jólaleg jól. Við sögu þeirra blönduðust söngatriði, dansatriði og jólagjafir sem lifna við. 

Krakkafréttir

Krakkafréttir héldu áfram að flytja fréttir af líðandi stundu yfir veturinn. Sem fyrr er lögð áhersla á skýrar og hnitmiðaðar fréttir af því helsta sem gerist í samfélaginu, bæði hér og erlendis. Einnig er lögð áhersla á sjónarhorn barna og leitað er leiða til þess að gera fréttaefnið bæði skiljanlegt og skemmtilegt í senn. Það er gert í bland við léttara efni, fréttir af íþróttum, menningu, vísindum og krökkum sem gera garðinn frægan, hvar sem þau er að finna. Krakkasvarið hélt áfram göngu sinni, vikulegt innslag þar sem grunnskólar um allt land fá sendar laufléttar spurningar og senda svörin á myndbandi og skora á annan skóla að gera það sama. Ungir fréttamenn vinna í samstarfi við Krakkafréttir og UngRÚV á vorin þar sem þau læra undirstöðuatriði í fréttamennsku og hjálpa til við að segja frá hinni fjölbreyttu Barnamenningarhátíð. Krakkafréttir sinna einnig árstíðabundnum fréttum, svo sem Söngvakeppninni og skýra hina ýmsu siði og venjur þjóðarinnar. 

Útvarp KrakkaRÚV

KrakkaRÚV framleiðir fjóra útvarpsþætti í hverri viku. Mánudaga til fimmtudaga kl. 18:30 á Rás 1.  

Frá janúar til júní fjölluðu Ingibjörg Fríða Helgadóttir, Jóhannes Ólafsson og Sævar Helgi Bragason um vísindi, menningu, krakkafréttir vikunnar og málefni líðandi stundar. Á fimmtudögum var fjallað um sögur frá öllum mögulegum sjónarhornum og voru þeir þættir hugsaðir sem upphitun fyrir Sögur, verðlaunahátíð barnanna.  

Um haustið 2019 hófu göngu sína nýir útvarpsþættir: Hljómboxið þar sem fjölskyldur keppa í hlustun, lesin saga er á dagskrá einu sinni í viku og frá september til febrúar 2020 er það Stormsker, fólkið sem fangaði vindinn eftir Birki Blæ Ingólfsson sem hlaut íslensku bókmenntaverðlaunin 2018. Krakkafréttir vikunnar héldu sínum stað og nýr þáttur fyrir unglinga Útvarp UngRÚV hóf göngu sína og þar sjá unglingar um dagskrárgerð, undir leiðsögn Hafsteins Vilhelmssonar verkefnastjóra UngRÚV, og fjalla um málefni sem brenna á unglingum í dag. 

Krakkaskaupið 

Krakkaskaupið hefur fest sig í sessi á KrakkaRÚV. Ýmislegt hefur verið prófað við gerð Krakkaskaupsins: eingöngu innsend myndbönd, handrit alfarið skrifað af krökkum og blanda af þessu tvennu og ákveðið var að byggja Krakkaskaupið í ár upp á innsendum myndböndum frá krökkum í bland við atriði sem Berglind Alda Ásþórsdóttir og Mikael Kaaber, þáttastjórnendur, skrifuðu. Berglind og Mikael léku sjálf og fengu með sér þekkt til að taka þátt í leiknu atriðunum. Innsend mynbönd voru um helmingur þáttarins. Alls bárust tæplega hundrað myndbönd.

Bókaormaráð og Krakkakiljan

Bókaormaráð KrakkaRÚV og Krakkakiljan héldu áfram frá janúar til maí. Bókaormar fjölluðu um uppáhaldsbækurnar sína og aðrar nýútkomnar bækur. Höfundar, þýðendur og myndhöfundar bókanna voru boðaðir hingað í hljóðver og krakkarnir, með aðstoð dagskrárgerðafólks, tóku viðtöl við þá og fengu hjá þeim góð ráð. Viðtölin voru birt á vef KrakkaRÚV og spiluð í fimmtudagsþáttum Útvarps KrakkaRÚV fram á vorið. 

Sögur – verðlaunahátíð barnanna 

Þetta risastóra verkefni um læsi og sköpun barna hófst haustið 2017 þar sem KrakkaRÚV auglýsti eftir innsendum sögum og handritum frá krökkum. Sögu verkefnið hefst í byrjun október ár hvert og lýkur á Sögum, verðlaunahátíð barnanna, að vori. Afrakstur þessarar vinnu og eru svo sögur sem opinberaðar eru á hvers kyns formi. Gerðar eru stuttmyndir, Borgarleikhúsið og Leikfélag Akureyrar setja upp sviðsverk, Útvarpsleikhúsið gerir útvarpsverk, Borgarbókasafnið heldur námskeið í skapandi skrifum og Menntamálastofnun gefur út rafbókina Risastórar smásögur. Sögur eru svo hápunkturinn. Hátíðin er í beinni útsendingu og þessar sögur eru verðlaunaðar sem og sögur sem ætlaðar eru börnum. Fagnefndir verðlauna börnin og börnin verðlauna þau verk sem framleidd eru fyrir þau. Þarna er barnamenningu síðastliðins árs gerð góð skil, krakkar sjá um flest skemmtiatriði og kynna verðlaunin ásamt fyrirmyndum sínum úr menningarlífinu. Að verkefninu standa Borgarbókasafnið, Reykjavík bókmenntaborg UNESCO, Menntamálaráðuneytið, Menntamálastofnun, Skóla- og frístundasvið Reykjavíkurborgar, SíUNG og fleiri.  

Sögu-spilið 

Í tengslum við Sögur hefur orðið til ný og spennandi þáttaröð í þremur hlutum, Söguspilið, sem eru þættir um ævintýraheim sagna. Þættirnir eru settir upp sem ævintýraspil þar sem krakkarnir sjálfir eru peðin á spilaborðinu og allar spurningar og þrautir tengjast barnabókum og sögum fyrir börn. Viskubrunnur sem talar reynir að villa um fyrir þeim, þau drekka galdraseiði og töfrast á milli heima. Óhætt er að segja að þættirnir hafi slegið í gegn. Ótal myndir og skilaboð bárust þar sem krakkar bjuggu til sína útgáfu af spilinu til að spila heima. Þættirnir voru framleiddir í samstarfi við Menntamálastofnun. 

Útsendingar frá menningarviðburðum barna 

Sýnt var beint, ýmist í sjónvarpinu eða á vefnum frá fjölda menningarviðburða barna og ungmenna. Þannig var bein útsending frá setningu Barnamenningarhátíðar á vef KrakkaRÚV sem og frá leikskólaviðburðinum Lífið er heimsins besta gotterí! sem er samstarf 32 leikskóla.  

UngRÚV

UngRÚV er þjónusta fyrir ungmenni í áttunda, níunda og tíunda bekk grunnskóla. Lögð er áhersla á dagskrárefni fyrir unglinga, eftir unglinga, og beinar útsendingar frá viðburðum og vandað efni sem framleitt er af RÚV. UngRÚV er með starfandi ungmennaráð sem sér um hugmyndavinnu, framleiðslu og aðrar dagskrártengdar ákvarðanir. UngRÚV er samstarfsverkefni skóla- og frístundasviðs Reykjavíkur og RÚV.  

UngRÚV skólinn  

UngRÚV skólinn er starfræktur í samstarfi við Vinnuskóla Reykjavíkur. Unglingum er boðið að koma og vinna við dagskrágerð í fjórar vikur. Við vinnum eftir „læra með því að gera“-aðferðafræðinni. Unglingarnir byrja að vinna saman í hópum og koma sér saman um hugmynd sem þau vilja framleiða. Hver og einn sér um að framleiða einn þátt í hverri seríu. Árið 2019 vorum við með tvær vef seríur: Svaraðu rétt eða gubbaðu létt og Hjartslátt. Í tökunum var skipt upp í stöðvar þar sem allir fengu að spreyta sig á þáttastjórn, myndatöku, hljóðupptöku og leikstjórn ásamt því að fá innsýn inn í starfið hér á RÚV. Í framhaldinu eru ungmennin svo hluti af UngRÚV-ráðinu sem sér um að skipuleggja og móta vefsíðu UngRÚV. 

Fréttamenn framtíðar 

Ungir fréttamenn er samstarfsverkefni UngRÚV, Krakkafrétta og Reykjavíkurborgar sem gengur út á að vekja áhuga ungs fólks á fréttum og fréttamennsku. Krakkar á unglingastigi grunnskólanna sækja námskeið þar sem þeim gefst tækifæri á að hitta reynda fulltrúa RÚV og læra allt um vinnubrögð fréttamanna, viðtalstækni og framsögu ásamt undirstöðuatriðum við myndbandsupptöku. Ungu fréttamennirnir fara svo á stúfana og kynna sér spennandi dagskrá Barnamenningarhátíðar í Reykjavík og flytja fréttir af hátíðinni sem sýndar eru í Krakkafréttum.  

Hæfileikarnir  

Hæfileikarnir voru haldnir í Stúdíói A í samstarfi við frístundamiðstöðvar í Reykjavík. Allar frístundamiðstöðvar héldu undankeppni og tvö atriði frá hverri miðstöð komust í lokakeppnina. Öll atriðin fengu handleiðslu fagfólks RÚV varðandi uppsetningu, framkomu og undirbúning. Kynnar hátíðarinnar voru unglingar úr UngRÚV-ráðinu. Óskað var eftir unglingum sem höfðu áhuga á myndatöku fyrir sjónvarp, hljóðupptöku, sviðsstörfum og förðun. Kosning í UngRÚV spilaranum í samstarfi við hugbúnaðardeild RÚV var skemmtileg viðbót við vel heppnaða keppni.  

SKREKKUR – Hæfileikakeppni grunnskólanna í Reykjavík

Lokakvöld Skrekks var í beinni útsendingu á RÚV og á vef UngRÚV í nóvember. Undanúrslitakvöldin eru þrjú og farið er í alla skóla sem taka þátt og kynningarinnslög unnin sem birtast á vefnum á hverju keppniskvöldi. Sýnt er frá öllum viðburðum í beinu streymi á UngRÚV.is. Í ár var áhugasömum unglingum að myndblanda í beinni útsendingu. Öll atriði birtust á vefnum að keppni lokinni.

Upptakturinn 

UngRÚV sá um undirbúning og umföllum um Upptaktinn, tónsköpunarverðlaun barna og ungmenna, sem er samstarfsverkefni RÚV, Hörpu, Barnamenningarhátíð í Reykjavík og Listaháskóla Íslands. Ungmenni á aldrinum 10-15 ára senda inn hugmyndir sínar í Upptaktinn og þær hugmyndir sem eru valdar eru fullunnar með liðsinni atvinnufólks í tónlist. Að lokum eru haldnir stórir uppskerutónleikar í Hörpu þar sem 12 ný verk eru frumflutt. Sex útvarpsþættir voru framleiddir, þar sem tónsmið og tónskáldi var fylgt í tali og tónum frá hugmyndastigi og til frumflutnings. Þættirnir voru fluttir á Rás 1 og gerðir aðgengilegir á vef UngRÚV, ásamt myndböndum með viðtölum við krakkana og lokaflutningi verksins. Sýnt var beint frá viðburðinum á vef UngRÚV.  

Verksmiðjan  

Verksmiðjan er nýsköpunarkeppni ungs fólks á aldrinum 13-16 ára. Undirbúningur og skipulag verkefnisins hófst haustið 2018 en keppnin hófst í byrjun janúar 2019. Þátttakendur unnu frumgerðir að hugmyndum/uppfinningum sínum í Fab Lab smiðjunum á Íslandi og með framleiðsluteymi RÚV. Fimm sjónvarpsþættir um Verksmiðjuna, iðngreinar og nýsköpun voru sýndir í tengslum við verkefnið. Tónlistarmaðurinn Daði Freyr tók virkan þátt í Verksmiðjunni og þróaði hljóðfæri í samstarfi við Fab Lab. Fylgst var með ferlinu á vef UngRÚV og í sjónvarpsþáttunum.  

Að verkefninu stóðu Samtök iðnaðarins, Nýsköpunarkeppni grunnskólanna, Nýsköpunarmiðstöð Íslands, Listasafn Reykjavíkur, Fab Lab á Íslandi og RÚV. 

Viðburðir ungmenna 

Sýnt var frá fjölda viðburða fyrir ungmenni, í sjónvarpi eða á vef. Sýnt var frá danskeppni Samfés, Stíl hönnunarkeppni Samfés, söngkeppni Samfés, Rímnaflæði og rappkeppni félagsmiðstöðvanna. Þá var einnig fjallað um Samfésballið, sem og fyrstu Dance World Cup-keppnina  sem fram fór í Borgarleikhúsinu. Streymt var beint frá keppninni á vef UngRÚV.

Hluti af samstarfi UngRÚV og Reykjavíkurborgar eru skólaheimsóknir 10. bekkinga. Vikulega koma unglingar úr skólum í Reykjavík og fræðast um sögu, starfsemi og hlutverk RÚV. Áhersla er lögð á að gera heimsóknirnar spennandi. 

Árið 2019 var annað starfsár RÚV núll og vegur þess jókst jafnt og þétt. Fimm vefþáttaseríur komu út, þar af fjórar sem voru framleiddar alfarið af RÚV núll. Níu nýjar hlaðvarpsþáttaraðir hófu göngu síma í bland við eldri þáttaraðir sem héldu áfram. RÚV núll var fyrirferðarmikið í þættinum Sumarið á RÚV en áhorf á þáttinn fór fram úr öllum væntingum og reyndist einn af vinsælustu þáttum RÚV árið 2019. Þegar haustaði tók RÚV núll þátt í að vekja athygli á málefnum ungs fólks með fíknivanda í þriggja sólarhringa langri útsendingu í samstarfi við landsátakið Ég á bara eitt líf og söfnunina Á allra vörum. RÚV núll setti ríkulegt mark sitt á Söngvakeppnina, Gettu betur, Söngkeppni framhaldsskólanna, þáttaröðina Hvað höfum við gert?, Tónaflóð Rásar 2 og annað efni sem RÚV framleiddi.

Fyrsta stóra vefþáttaröð ársins var Sósan. Þar var fjallað um tísku á Íslandi, talað við íslenska hönnuði sem hanna fyrir risastór vörumerki í bland við minni einyrkja sem jafnvel smíða strigaskó í herberginu sínu. Því næst kom þáttaröðin Nippon sem framleidd var af Stefáni Þór Þorgeirssyni og gaf áhugaverða sýn inn í líf og menningu Japans. Önnur þáttaröð Rabbabara, þar sem talað er við ungt tónlistarfólk, hóf göngu sína um haustið og fékk frábærar viðtökur. Þáttaröðin KLINK, fræðsluþættir um fjármál fyrir ungt fólk, voru sýndir í október og árinu lauk með 24 þátta leiknu jóladagatali, Jólakortinu.