RÚV okkar allra
Hér upplýsum við um starfsemina, bjóðum upp á samtal og svörum spurningum þínum

Snærós Sindradóttir hefur verið ráðin verkefnastjóri UngRÚV

Mynd með færslu
 Mynd: RÚV
Snærós Sindradóttir hefur verið ráðin í starf verkefnastjóra UngRÚV. Hún hefur störf í byrjun ágúst og leiðir uppbyggingu á þjónustu RÚV fyrir ungt fólk þvert á miðla.

Snærós er 25 ára og hefur starfað sem blaðamaður hjá Fréttablaðinu undanfarin ár. Snærós kemur inn með skýra sýn á nýjar leiðir í miðlun almannaþjónustu til ungs fólks og þekkir vel þær áskoranir sem hefðbundnir fjölmiðlar standa frammi fyrir í dag. Hún hlaut blaðamannaverðlaun Blaðamannafélags Íslands fyrir viðtal ársins 2016 og starfaði þar áður með ungu fólki hjá velferðarsviði Reykjavíkurborgar.  

Meðal aðaláherslna í nýrri stefnu RÚV til 2021 er að RÚV ætlar að bæta þjónustu við fólk á aldrinum 15-29 ára. Verkefni Snærósar er að opna og leiða samtalið við ungt fólk, rýna í þarfir hópsins og koma með tillögur að úrbótum á þjónustu RÚV við hópinn. Hún þróar tillögur að nýrri þjónustu og miðlun til að sinna þörfum þeirra, auk þess sem hún rýnir núverandi dagskrárframboð og tekur ákvarðanir um dagskrá í samstarfi við dagskrárstjóra. Snærós mun starfa náið með faghópi um þjónustu RÚV við ungt fólk sem verður myndaður með haustinu.

Við bjóðum Snærós innilega velkomna í hópinn.