Sunnudaginn 7. febrúar kemur í ljós í hvorum undanriðlinum Ísland keppir í Söngvakeppni evrópskra sjónvarpsstöðva, Evróvisjón, í Osló í maí. Fyrri undanriðillinn er 25. maí en sá síðari 27. maí. Aðalkeppnin fer fram laugardaginn 29. maí.

Alríkisdómstóll í Sydney í Ástralíu hefur úrskurðað að flautustef lagsins Down Under með áströlsku hljómsveitinni Men At Work sé stolið. Hljómsveitinni beri að greiða rétthöfum sönglagsins Kookaburra Sits In The Old Gum Tree hæfilegar skaðabætur. Síðarnefnda lagið var samið árið 1934 og var um áratuga skeið vinsælt barnalag í Ástralíu.

Þótt Alexander Ómar Breiðfjörð Kristjánsson, sé aðeins níu ára hefur hann náð ótrúlegum tökum á blýantsteikningum þar sem hann teiknar aðallega andlitsmyndir af þekktum Íslendingum. Forsetinn og Þórbergur Þórðarson, rithöfundur eru í mestu uppáhaldi hjá honum.

Gylfi Magnússon efnahags- og viðskiptaráðherra segir reiði Hollendinga skiljanlega - þeir vilji finna sökudólga, rétt eins og íslensk yfirvöld. Steingrímur J. Sigfússon, fjármálaráðherra vonar að þetta trufli ekki viðræður um lausn í Icesave deilunni.

Nout Wellink, seðlabankastjóri Hollands, kveðst enga ábyrgð bera á því hvernig fór fyrir Icesave í Hollandi. Íslendingar hafi sagt að allt væri í lagi og ábyrgðin sé þeirra.

Eftirlitsnefnd sveitarfélaga lagði til við samgönguráðherra í dag að sett yrði fjárhagsstjórn yfir sveitarfélagið Álftanes. Ráðherra mun taka ákvörðun um framhaldið á morgun eða allra næstu dögum.

Arion Banki hyggst skrá Haga í Kauphöllina, þar sem selja á hlut bankans í opnu útboðsferli. Núverandi stjórnendum Haga gefst kostur á að kaupa 15% hlut, þar af Jóhannesi Jónssyni 10%, en hann verður áfram stjórnarformaður fyrirtækisins.

Tólf tilboð hafa borist í tryggingarfélagið Sjóvá. Í tilkynningu frá Íslandsbanka sem annast söluna segir að flest tilboðin séu í allt hlutafé fyrirtækisins.

Aðeins tæpir ellefu milljarðar af gjaldeyri hafa komið til landsins í formi nýfjárfestinga frá því losað var að hluta til um gjaldeyrishöftin. Vilhjálmur Egilsson, framkvæmdastjóri Samtaka atvinnulífsins, segir þetta sýna að óhætt sé að afnema höftin með öllu.