Vill rannsókn á morðum 42 flóttamanna

20.03.2017 - 16:03
Erlent · Jemen
epa05854735 Yemenis inspect bodies of Somali migrants who were allegedly killed in a helicopter attack while traveling in a boat off the coast of Yemen, in the western Yemeni city of Hodeida, 17 March 2017. According to media reports at least 42 Somali
Jemenskir borgarar huga að jarðneskum leifum sómalskra flóttamanna, sem létust í árás á bát þeirra undan Jemenströndum í mars.  Mynd: EPA
Yfirmaður UNHCR, Flóttamannastofnunar Sameinuðu þjóðanna vill ítarlega rannsókn á morðum 42 flóttamanna undan strönd Jemens síðasta föstudag. Flóttafólkið, aðallega frá Sómalíu, var í bát sem talið er að hafi verið á leið frá hafnarborginni Hodeida í Jemen, til Súdan þegar þyrla réðst á bátinn. Tugir komust af og voru fluttir aftur til Hodeida. Sádí-Arabar og samstarfsríki þeirra í hernaðinum í Jemen segjast ekki hafa staðið fyrir þessari árás.

Þau minnast ekkert á þá kröfu stjórnvalda í Sómalíu um rannsókn á atburðinum, en segja að taki Sameinuðu þjóðirnar við stjórnartaumunum í Hodeida verði hægt að tryggja sendingar á hjálpargögnum til nauðstaddra í Jemen og binda enda á að borgin sé bækistöð vopnasmygls og mansals. Bandaríkjaher sendi frá sér yfirlýsingu fyrir helgi og sagðist heldur ekki hafa komið nærri árásinni á föstudag.

Bandaríkjamenn styðja einnig  Abd-Rabbu Mansour Hadi, forseta Jemens, og stjórn hans í baráttunni gegn uppreisnarmönnum Hútífylkingarinnar og bandamanna þeirra. Bandaríkjamenn hafa gert fjölda loftárása á Jemen að undanförnu, sem að sögn hafa beinst gegn al-Kaídasamtökunum og bækistöðvum þeirra. 

Samkvæmt mati Flóttamannahjálparinnar eru meira en 250 þúsund sómalskir flóttamenn í Jemen.