Strandveiðikvótinn aukinn um 560 tonn

04.08.2017 - 12:31
Súðavík 
fystihús fiskvinnsla atvinna höfnin bryggja bátar bátur skip
 Mynd: Jóhannes Jónsson
Sjávarútvegs- og landbúnaðarráðherra hefur ákveðið að auka aflaheimildir til strandveiða um 560 tonn og verða strandveiðiheimildir því 9.760 tonn á þessari vertíð.

 

Í tilkynningu atvinnuvegaráðuneytisins segir að með þessari ákvörðun sé verið að koma til móts við samþykkt stjórnar Landssambands smábátaeigenda þar sem skorað var á ráðherra að auka aflaviðmiðin í ágúst þar sem strandveiðarnar í ár hafi ekki uppfyllt væntingar. Þrátt fyrir að færri stundi veiðarnar í ár en í fyrra, og meira komi í hlut hvers og eins, þá er aflaverðmæti nú fjórðungi minna en í fyrra.

Í tilkynningu ráðuneytisins kemur fram að ekki sé verið að auka heildaraflaheimildir heldur sé þetta tilfutningur á heimildum. 

Auknar heimildir skiptast hlutfallslega á milli strandveiðisvæðanna fjögurra og er gert ráð fyrir því að þessi viðbót geti alla vega aukið sókn um tvo daga á hverju svæði. Örn Pálsson, framkvæmdastjóri Landsambands smábátaeigenda, segir um 420 báta vera að meðaltali á strandveiðum í ágúst. Allir fái tvo veiðidaga til viðbótar og jafnvel fleiri á sumum svæðum, það fari eftir aflabrögðum. Hann fagnar ákvörðun sjávarútvegsráðherra.