Hlutabréfaverð í Högum snarfellur

08.08.2017 - 10:37
Selfoss Verslun miðstöð verlunarmiðstöð Bónus Hagkaup
 Mynd: Jónsson Jónsson  -  Jóhannes Jóhannes
Hlutabréf í Högum hafa lækkað að verðmæti um rúm sex prósent frá því opnað var fyrir viðskipti í Kauphöllinni í morgun. Lækkunin kemur ekki á óvart þar sem fyrirtækið sendi frá sér afkomuviðvörun um helgina. Þar kom fram að samdráttur í sölu sem hófst með innkomu Costco á markað í júní hefði haldið áfram í júlí.

Forsvarsmenn fyrirtækisins sögðu í tilkynningu til Kauphallarinnar að gera mætti ráð fyrir að EBITDA í mars til ágúst verði um 20 prósent lægri en á sama tíma í fyrra. Það var rakið til sölusamdráttar vegna gengisþróunar og breyttrar markaðsstöðu ásamt kostnaðarauka. Þetta er önnur afkomuviðvörunin sem Hagar senda frá sér.

Mikil breyting hefur orðið á verðmæti fyrirtækisins síðustu mánuði. Hlutabréf seldust á genginu 50 til 55 frá því í október í fyrra fram í mars. Þá fór hlutabréfaverð niður í rétt rúma 45 áður en það hækkaði aftur í maí eftir að tilkynnt var um fyrirhuguð kaup Haga á Olís. Þá voru bréf seld á genginu 55. Frá því í júní hefur verðmæti hlutabréfa í Högum hrunið, farið úr 55 í tæpa 37 í morgun. Það er lækkun um tæpan þriðjung á tveimur mánuðum.

Brynjólfur Þór Guðmundsson
Fréttastofa RÚV