Færa ekki ruslafötuna fyrr en nýr texti kemur

06.07.2017 - 11:14
Bragi Valdimar Skúlason, einn afkastamesti textahöfundur þjóðarinnar, var beðinn um að semja texta fyrir tónlistarmanninn Ásgeir og skila honum inn fyrir hádegi. Matthías Már Magnússon, dagskrárgerðamaður og Guðmundur Kristinn Jónsson, tónlistarmaður skoruðu Braga á hólm í beinni útsendingu frá kaffistofunni í Hljóðrita.

Nú stendur yfir maraþonútsending, eða svokallað hægvarp Ásgeirs þar sem hann tekur upp lög beint á 7 tommu vínylplötur í hljóðverinu Hljóðrita í Hafnarfirði, samfleytt í 24 klukkutíma. Bein útsending hefur staðið yfir síðan í gær á RÚV2, RÚV.is og á Youtube-síðu Ásgeirs.

Bragi Valdimar hafði lýst yfir óánægju sinni með að ruslatunnan á kaffistofunni væri sífellt í mynd í útsendingunni. Matthías og Guðmundur Kristinn sögðu Braga að hún yrði ekki fjarlægð nema að Bragi myndi semja nýjan texta fyrir Ásgeir og gáfu honum rétt rúman klukkutíma til verksins, eða til hádegis. „Við skulum ekki færa ruslafötuna, ekki fyrr en textinn kemur,“ sagði Guðmundur Kristinn.

Uppfært: Bragi Valdimar sendi nýjan texta og ruslafatan var fjarlægð.

Mynd með færslu
Atli Þór Ægisson
vefritstjórn
Ásgeir - beint á vínyl