Erlendu starfsfólki fjölgaði um 17% á einu ári

13.09.2017 - 06:45
Mynd með færslu
 Mynd: RÚV
Erlendum ríkisborgurum sem starfa hér á landi hefur fjölgað um 65 prósent á undanförnum fimm árum og um rúm 17 prósent á síðustu tólf mánuðum. Aldrei fyrr hafa svo margir erlendir ríkisborgarar starfað hér á landi. Þetta kemur fram í Markaðnum sem fylgir Fréttablaðinu í dag.

Þrátt fyrir þennan fjölda erlendra starfsmanna er skortur á starfsfólki í flestum greinum, einkum í byggingariðnaði og ferðaþjónustu. Haft er eftir Ingólfi Bender, hagfræðingi Samtaka iðnaðarins, að hápunktur nálgist þegar litið er til spennu á vinnumarkaði.

Katrín Ólafsdóttir, lektor við Háskólann í Reykjavík og nefndarmaður í peningastefnunefnd Seðlabanka Íslands, segir mikla spennu á vinnumarkaði  en að mikil aukning erlendra starfsmanna vegi þar á móti. Ef ekki væri fyrir þá, væri staðan allt önnur. „Launaskrið og verðbólga hefðu þá gert vart við sig og okkur hefði ekki tekist að þjóna öllum þeim ferðamönnum sem hér eru,“ er haft eftir Katrínu í Markaðnum.

Einn viðmælandi Markaðarins segir að flytja þurfi inn þúsundir erlendra starfsmanna til viðbótar vegna mikilllar eftirspurnar. Þá kemur fram í fréttinni að erlendir starfsmenn á vegum starfsmannaleiga hafi verið tæplega 1.900 í júlí síðastliðnum. Samkvæmt spá Vinnumálastofnunar verður fjöldinn orðinn 2.500 í næsta mánuði, haldi áfram sem horfir.

Dagný Hulda Erlendsdóttir